Mizoram Zirlai Pawl (MZP) buatsaihin vawiin khan Pachhunga University College Multicomplex Auditorium-ah Remna Ni lawmna hun hman a ni a. He inkhawmah hian Chief Minister Pu Lal Thanhawla chu khuallian niin, remna leh muanna atan a thawhhlawk mi pathum hnenah chawimawina hlan a ni bawk.

Vawiin Remna Ni lawmna inkhawmah hian Pu Laldenga (L), Founder President, MNF, Pu Lalkhama, IAS (Rtd.) leh Pu Lal Thanhawla, MPCC President te hnenah remna leh muanna a awm theih nana hma an lo lakna avangin MZP chuan chawimawina a hlan a ni.

Khuallian Chief Minister Pu Lal Thanhawla chuan MZP in a huhova Mizoram tana ni pawimawh tak Remna Ni a huhova lawmna hun an siam chu lawmawm a ti a. Rambuai laia mipui nitin nun hlauthawng leh thlabar taka an awm thin dan te sawiin, "remna leh muanna hlutzia hi tunlai miten kan hriat thar zel a pawimawhin, a vawnhim leh chhawm nun zel naah tupawh hi kan mawhphurhna a inchen tlang a ni" a ti. Pu Lal Thanhawla chuan Mizorama remna leh muanna siam tura thawktu an tam zia te, huaisen taka ram mipuiin nun pangngai an neih nana mahni theihna zawn theuhva hma lak a nih dante sawiin, Mizoram economy in tunhnaia nasa taka hma a sawn theih chhan chu ram leh mipui mamawh ruahmanna te siam a kalpui vang a ni a, hengte hi remna tello chuan tih theih miah a ni dawnlo a ni, a ti. Khuallian chuan Mizoramin remna a neih hlu tak chu Pathian avanga a ni tih hriain, a vawnghimtu ni theuh turin mipui a sawm a ni.

Vawiin inkhawmah hian Pu Zoramthanga, MNF President leh Pu Lalduhoma, ZPM President te chuan thu sawi bawkin, remna a awm theih nana mi tam takin tha leh zung an thawh dan te, Mizoram a chengte ta a nih thu leh, Mizoramin remna tluangtling a neih ang nei ve duh leh entawntlak ti ram dang mi an awm te, remna leh muanna a awm zel theih nan tupawh an pawimawh thu te an sawi a ni. Anni bakah hian CYMA, MUP, MHIP leh MSU hruaitute atangin thusawi ngaihthlak a ni bawk.

Remna Ni lawmna programme hi Pu B. Vanlaltana, MZP Vice President chuan a kaihruai a, an president Pu L. Ramdinliana Renthlei chuan thu a sawi bawkin, Treasurer Pu Michael Lalramsanga chuan lawmthu sawiin hun a khar a ni. Mizoram Political Party hrang hrang leh tlawmngai pawlte bakah zirlai naupangte vawiin programme ah hian an kalkhawm a ni.

Attachment

  • Loading attachment...