Nimin (30.6.2018) khan Chief Minister Pu Lal Thanhawla chuan API North East Initiative thawh hnihna chu Aijal Club-ah khuallian niin a hmanpui.

He programme hi Association of Physicians (API), East Zone (API) leh Indian College of Physicians (ICP) tangkawpin India hmarchhak doctor te thlungkhawm a, hun inher zela thiamna thar lo awm chho zelah hmun kilkhawr bera doctor hnathawkte pawhin awlsam zawka an hriatna an belhchhah theih nana hmalakna a ni.

Chief Minister chuan India chu hmasawnna kawng zawh mek ram a nih angin thil tam tak zingah a chhunga cheng mipuite hriselna chu ngaihpawimawh leh zual tur thil a nih thu a sawi a. Mizoram pawh banglo in, sawrkar pawhin specialist doctor tam zawk a neih theih nan theih ang anga hma a lak thu te, hriselna kawnga hmasawn chak zawk nan Medical College din a, college changtlung tak a nih theih nan rim taka thawh mek zel a nih thu te leh, Biodiversity lamah Mizoram hausakna chu hman tangkai a nih a, ramhmul damdawite zirchiang tura research Centre din tur a hma lak a nih thu te a sawi a. CM Pu Lal Thanhawla chuan doctor-te chu an mihring puite tidam thei tura malsawmna changtu thiamna nei an ni tih inhre reng a, khawngaihna leh hmangaihna rilru pu chunga enkawltu ni turin a chah a ni.

Nimin programme hi API Mizoram Chapter in thlengin, India hmarchhak state hrang hrang atangin member leh mithiam sawm bikte an tel a. Sanatra Health Care chu partner company a ni. Mi 13 hnen atangin natna hrang hrang enkawlna kawnga hmasawnna thar awmte ngaihthlak leh sawihona hun hman a ni. API Northeast Initiative hnuaiah hian doctor ten an thiamna awlsam zawka an belhchhah theih nan journal leh lehkhabu te siam a, intawhkhawmna te buatsaihin hma lak thin a ni.

Attachment

  • Loading attachment...