Zoram mipui he kan Remna ni, a champha vawi 35-na lawmna tura kan thusawi ngaithlatu zawng zawng in zavaiin chibai ka buk a che u. Covid buaina leh hripui karah sawrkarina kan duh ang zawngin Vanapa Hall-ah te emaw, Lammualah emaw ropui taka hman a theih ta lova. Amaherawh chu mipui hnena kan thuchahte erawh chu kan theih ang chin chin kan ngaihthlak tlan turin kan han sawiin chibai kan han inbuk hmasa a ni.
Mizoram Remna, a cham vawi 35-na kan lo thlen takah hian kan rilrua lo lang chu Mizoram buai laia a buaizia, India ram hmundangah leh khawvel hmun tam takah pawh an tih loh hman a ni a; entirnan, thlawhna hmangin, Jet Fighter hmangin nasa takin kan khua, kan khawpui leh khawdang tam tak Bomb darh ur ur a ni a. Tin, chu chauh chu niloin, grouping center-te siamin, thingtlanga khua zawng zawng tih theih deuhthaw hmunkhata khalhkhawma Sakuhdaia hungin, sipai camp khirh ber ang maiin, khatiang khan Mizoram kha a awm thin a ni a. Chuvangin a buai vanglai chuan khatianga an tihna kha India ram kan chhehvelah ram rambuai sawisakna a awm lo reng reng a, khutah kan underground dang midang te, hteah northeast-a mi an ni emaw a nih loh leh naxal-ho an ni emaw, 'thlawhna in hmang dawn em?' an tih pawhin, 'kan hmang lovang - mahni ramchhungah' an ti a, 'Mizoramah lem in hman si,' an tih khawpa khatianga rambuai nasa kha a ni. Amaherawh chu Pathian hnenah Kohhranho an tawngtai a, party an tawngtai a, NGO an tawngtawi a, mipui leh mimal tinte nasa takin remna atan an tawngtai a, chumi rah chu chhuahin 1986-ah remna a lo thlen takah chuan remna model, remnaa hlawhtling ber niin, India ramchhunga remna siam tawh zinga hlawhtling lawtlak, kan chhehvel ram dangte pawhina India ramchhung mai ni lo, Myanmar ram leh hmundang pawhina entawn model atana an duh khawp inremna kan lo nei ta a. Khami hnuah tumah khata mite underground-a chhuak leh an awm tawh lova, silai pakhat leh silaimu pakhat pawh tlansan lovin India sawrkar nena kan inremna chu mawi takin Pathianina min pek ang, vawiin ni kan lo thleng ta a ni.
Hetah hian inremna tha deuh mai kan han nei hi a entawn tur atan kan thenawm state, hei northeast-a mi rambuai nei deuh vek an ni a, hemite hian 'Mizoram remna ang hi kan duh ve a ni' an ti a, theihtawpin neih tumin 'A palai pawh Mizoram hruaitute in ni tur a ni' an ti a. Chuti khawpa sawrkar hrang hrang, tunhma kum engemawti atang tawha remna siam tura model-ah leh, chuta thawk tur atan pawh Mizoram leh chuta a mite hman an duhthu an tarlang zel a. Chu chauh chu ni loin, kan thenawm ram Myanmar ram, rambuai em ema underground group tam takte pawhina 'Mizoram remna ang hi kan duh ve a ni' tiin India sawrkar hnenah an rawn sawi a. Chumi ang chuan keini pawh India ram hruaitute nen, keini pawh Burma ram sipai sawrkarna hnuaiah sipai sorkarin min tir a, tin, chutiang ang bawkin, underground-a Myanmar-a awm zawng zawngte pawhin hmunkhata inhmukhawmin, remna tur atana India sawrkarte nen hma kan chhawp a, kan chhawp hnuhnung ber phei chu india ramah lokala Mizoram remnate pawh rawn ena entawna tihte pawh an duh a. Amaherawh chu, political thil buai chi hrang hrang avangin a kal tluang thei ta lo zawk a, vawiin ni thlengin remna atan hian an duh ber leh entawn atana an duh chu Mizoram inremna kha a ni. Chuvangin, Mizoram inremna hi tunah chuan kan export theih, kan thawnchhuah theih, mi hnena kan tarlan, kan en chhuahtir theih entawn tur tha tak a lo ni ta, a ropui kan ti. Hei hi mipuite tawngtaina a ni a, Kohhrante tawngtaina a ni a, NGO leh Political party hrang hrang, mi hrang hrangte thawhna leh tawngtaina rah a ni.
Chuvangin, export tlak he kan remna a lo ni hi Mizoramin kan eng chhuah hmahruaitu pawimawh tak a nih avangin, vawiina kan Remna Ni champhaah hian chu chu remna ni, remna export tlak, kan thenawm ram leh ramdang pawhina 'kan duh ve' an tih, enna chhuah chu chu kan nei a ni tih hi vawiinah hian mipuiin i hre thar leh ang u. A tichhe zawng emaw a hminghliau zawng emawin tumah kan awm ngai lova, kan awm pawh ka ring lova, kan hlut tlang a Pathianina min pek hi a hlu a, kan vai hian kan lawm a, ropui pawh kan ti a, remna sign zan ang tluka hlimna ni kha Mizoramah a la awm lo an lo ti a nih kha.
A dawt leha ka'n sawi leh duh chu, tuna inremna hnuaiah chuan Mizoram chu UT atangin State-ah a lut a, tichuan state-ah pawh inhumhalhna tha bik article 371(G) ang leh a dang ang angte pawhin tha deuh mai kan nei ta a, hei hi Mizoten kan duhthusam ang thlap a ni lova, India sawrkar duhthusam pawh a ni lova, amaherawh chu mipuitena 'siam rawh u, in inrem theihna apiang chu kan pawm thei ang tha kan ti e,' an tih khan Pathianin kan sirtluk tawnna tur inremna min pe niin kan hria a, a tu-ate duhthusam mah ni lo mahsela a ropui, Pathianin a tawk a tih a ni.
Bangladesh chuan rei vak lo Independence an sual a, Pathianin eng hmangin emaw Independent a pe mai a ni. Keini'n kum 20 kan sual a, a tawpah statehood leh special protection-ah kan kal ta a ni. Pathian hian a duh ni sela, Mizoram tan hian kan independence te hi a eng hmanraw hmangin emaw a ti thei vek tih kan hria. Amaherawh chu kan tawngtai chhanna chu 'tun ang hi a tawk hrih e' a ti a ni.
Tichuan India hmang hian Mizoram siam turin Pathianin a thiltum chu, India ram hmang hian min kalpui a tum rih a ni ang. 'India ramah awm leh rawh u, India ram state pakhatah in awm a tha a ni,' min tia rem min siamsak hi engtiang takin nge kan hman ang tih hi kan ngaihtuah tuna kan Remna Ni champha atan hian a thain ka hria. Keini Kristian ram kan ni a, hei kan hriat angin Mizoram chu, qualification chi hrang hrang ka han sawi ang a, pakhatnaah chuan mahnia ro inrelna hlawm fel tak nei state ram, India ramah a pawimawh tak pakhat kan lo ni a. Tin, tawngkhat kan hmang bawk a, tawngkhat hman hi a a pawimawh, tawng hrang tam lutuk chu engmah hna a thawh chak theih loh. A tlangpui thuin sakhaw khat bia Kristian kan lo ni bawk a, a hlawm fel taka kan awmna, tin, lehkhathiam tamna, India ramah, Mizo ngat phei chu India ramah ziak leh chhiar thiamlo pawh kan awm bar lovin, kan society leh kan NGO-te an thurualin an chak tha a, India ramah pakhatna a nih ka ring bawk a ni. Tin, chu lovah chuan, India ramah Kristian tam tak, state tam tak an awm, kan aia upa daih tawhte an ni. Amaherawh chu Pathianina Mizoram min hmanna chu, India rama Kristian missionary hnathawk tura kalkhawm chi reng reng hian Mizoram bekthlek an en a ni. Mizoram hi a lawtlakin India ram state-ah missionary thawnchhuah chungchang thu leh sakhuana kalchho zelah hian lawtlak kan ni. Keini min hnaihtu chu Meghlaya te, Nagaland te an ni. Nimahsela kan ne pawh an ek pha lo, kan tawng an huatthu suhah, chutiang chuan Pathian Thlarau-ina harhtharlehna a pek zin ber ram kan ni. Chutiang qualification zawng zawng chu en ila, Europe-ah emaw, Asia khawmualpui dangah emaw hian an awm lo. Chuvangin, Pathian hian a chanchintha hril tur hian tu hnam emaw, tu ram emaw, tuteho emaw hi buatsaih dawn sela, Mizote leh Mizo hnam leh Mizo Kristiante aia buatsaih nahawm zawk hi a dang an awm ka ring lo. Asia khawmualpuiah pawh en ta ila, khutah Turkey lam side atanga hetah Seol leh Korea lam thleng pawhin en ila, keini ang hi pakhat mah an awm lo, tin, tunah tak chuan mahni population mil tawka missionary tirchhuak tam ber khawvelah kan ni. America pawhin min pha lo. Chuti chung chuan kan la induhkhawplo em em a, kan Kohhrante pawhin theihtawpin i bei ang u, an ti. Chumi tur atan chuan tunah missionary tirchhuak tam ber, mahni population base-in ni mah ila, missionary tur kan duh e Kohhranin a tih chuan lak sen loh kan la interview a ni. Chuvangin a ropui em em a ni. Hemi hi nasa leh zuala hmang turin Pathianin min duh.
Pathianina a thupek, Lal Isuan khawvel a chhuahsan dawna a thupek chu, ‘Thilsiam zawng zawng hnenah chanchintha hi hril rawh u, kal ula ram tina mite hnenah chanchintha hril ula, tichuan khawvel tawp thlengin in hnenah ka awm zel ang, Lei leh vana thuneihna zawng zawng hi ka ta ni,' a ti bawk a ni. Chuvangin, he chanchintha hril tura min tirhna hi Pathian standing commandment, thupek ding, khawvela a rawn kal chhan kha a ni a, chumi chu ti turin a pawimawh bera Mizoram state-a awm emaw, Independent a ni emaw, a ni lo emaw, khalam chu a
pawimawhna chente awm mahsela, a pawimawh ber Pathianin leilunga min pek chu thilsiam zawng zawng hnenah ka chhandamna chanchintha hril rawh u, tih aia pawimawh a awm lo. Chumi atan chuan Zoram pawh hi a buatsaih a ni ang tih ka ring. Tin, chumi atan chuan tunah missionary-te, thawh chhuah leh kal duh tam tak awm mah ila kan retheihna leh kan harsatna avangin kan kohhranten thawhlawm an la ngah tawk lova, chumi atan chuan kan harsatna hian min la phuar a ni.
Chuvangin Zoram Pathianina malsawmna min pek lei chung hausakna nasa em em, leihnuai hausakna nasa em em, boruakah leh ni enga hausakna min pek, ram ni sela a mihring let hnih/let thum pawh min chawmzo ram, ruahtui la tha em em, lui nise kan hman sen loh a awm seng sung mai, heng zawng zawng malsawmna Pathianina min pek hi haichhuak a, he hun hnuhnunga a chanchintha hril tura Zoram hi buatsaih turin Pathianin min duh a ni, tih hi kei ka thuthlung, ka conviction a ni a, chu chu ram hruai ka tumna pawh a ni. Hei aia pawimawh a awm lo. A dang zawng zawng, mimal sawrkar, party, pawlte hi chu a behbawm kal ve chauh a ni. Chuvangin hemi atan hian Pathianin tunah min buatsaih mek niin ka hria a, chumi tur atan chuan Zoram mipui pawh tun Inremna ni champhaah hian rilru leh ngaihtuahna zawng zawng hi lo hmang turin ka'n duh che u a ni.
A dawt leha ka'n sawi leh duh chu, he Covid natna rapthlak pui mai hripui hian khawvel a han tuam ta a, tunhma chuan hripuite pawh a awm thin, heti em em a ni ngai lo. Indopui pakhatna pawh kan hmu, Indopui pahnihna pawh kan hmu, ram chumiin a tihbuailoh tam tak an awm. Amaherawh chu covid natnaa Pathianin a khawvel a han hruttir meuh chu, a khawih loh ram leh a nghawng loh ram a awm lo. Chuvangin, engatinge heng hi? Keiina ka ngaihtuah danah chuan Isaia bung khatah, “Aw vante u ngaithla ula, aw leilung i bengchhi rawh, Lalpa chuan thu a sawi e,” a ti. 'Mi sang leh ropui leh sorkar ropui leh hausate u, ngaithla ula, mirethei leh hnuaihnungte u, nangni pawhin lo ngaithla ula, Lalpa’n thu a sawi e,' a ti. Engnge Pathianin hetah hian thu a sawi? Sam ziaka kan hmuh angin, kan awmdan zawng zawng leh kan nun dan zawng zawng chungah hian Pathianin thu a nei a ni tih hriat nan, 'Ngawi ula, Pathian ka ni tih hi hre rawh u, khawvela sawrkar ropuite u, min duhtu leh min duh lotute u, hausa leh retheite u, ngawi ula, Pathian ka ni tih hi hre rawh u,' a ti a min han vua a, kan daiduk mai a ni. Tumahin tihngaihna kan hre tawh lo.
Ti hian kan mangang hi kan au chuah chuah ringawt mai a ni. Mawhphurh tur kan inzawng a, kawng chi tinrengin mawh kan inpe tlang a ni. Pathianin a sawi duh chu, ‘Ngawi ula, Pathian ka ni tih hi hre rawh u. Chuvangin, Aw vante u ngaithla ula, leilung bengchhi rawh Lalpa’n thu a sawi e,' Lalpa thusawia chu engnge tih kan ngaihthlak erawh chu a duh a, chumi tur atan chuan min buatsaih a ni. Chuvangin, tunah tak hian ka rin dan chuan he covid hmang hian khawvel hi engti kawng mahin a do thei tur hian chakna kan nei lo tih min hrilha kan tlawm chiang a ni tih hi min hrilh a duh a. H.G..Wales-an 'The War of the World' a tih, 'Marsian, sikeisen atanga mihring lokalten England ram an run a, England sorkar leh sipaiten tihngaihna an hre lova, amaherawh chu ni thum ni li lekah a reh ruih mai a, bacteria natna hrik pakhat kha sikeisena mi chakte khan an lo ngam reng reng lova. Chuvangin reiloteah an lo thi ral vek mai a lo ni,' a tih tunhmaa mite kha tuna mi aia nasain England ram chauh run lovin, khawvel pumpui min run ta. Chuvangin Pathianin, “ Ngaithla rawh u” a ti a ni. chumiah chuan ka rilrua lo awm chu, khawvel zawng zawng engmah lo mai kan lo ni, tih kan hriat hnu hian, chanchintha hril turin Pathianin khawvel hi buatsaih a tum niin ka hria. Isua thusawi ngeiah he ram chanchintha hi hnamtin hnenah hrilh darhin a awm ang, chumi zawhah chuan tawpna chu a lo thleng ang a ti.
Maktaduai tel tam hi hnam anga chanchintha la dawng lo kan awm, tawpna la thleng thei pawh a la ni lo. Chumi hma chuan chanchintha hril turin mih duh a, chuta a aw ri pakhat chu tuna kan covid hripui hi a niin ka ring a ni. Chumi a zawhah chuan ka rindan tak chuan, he covid natna hi Pathianin a titawp ngei ang. Heta Israel-te chunga hripui a len khan, Arouna hruizawl chunga Vantirhkoh khandaih keng leh mi hnenah khan, ‘A tawk ta, duhtawk tawh rawh’ a ti a, tichuan a'n han titawp ta a, he khawvel chunga Vantirhkoh khandaih hripui covid lentirtu hemi hnenah pawh hian, ‘a tawk ta’ tih hun a nei ang. Chumi zawhah chuan Zoram pawhin Lalpa chanchintha hril turin malsawmna kan dawng ang; malsawmna haichhuahna-pui a lo thleng ang. Kan ram hausakna leh malsawmna zawng zawng hi Pathianin min peka min haichhuahtir hunin a rawn zui ang a, tin, chumi rual chuan chanchintha hrila a tam zawk kan kal theihna turin Pathian Thlaraua harhtharlehna pawh kan nei ngeiin ka ring. Chumi zawhah chuan ram tina mite hnenah chanchintha hi hril rawh u a tih a, a thlan zingah Mizo hnamte hi a hmahruaitu pawimawh ber pakhat kan nih ka beisei a, chu chu ka duhthusam a ni a, ka rinna pawh a ni bawk a, thlentir tumin keipawhin theihtawpin Pathian hnenah tawngtaina nen ka dil a ni.
Chuvangin, covid hi hetia lo thleng ngawt a, hetia min hrem hrim hrim nana tih a ni lo. 'Ngawi ula, Pathian ka ni, tih hi hria ula, engnge ka sawi tih hi ngaithla rawh u,' min tihnaah ka ngai.
Chuvangin Zoram pawh tunah kawng chi tinrengin buaiin harsa mah ila, ‘In buai nasat poh leh ka ropuina a lo lang dawn a ni, a ti. kan buai nasatzia chu kan hria, heti khawpa covid-in min tihbuai hnuah hian, vawk hrileng ringawt pawh a sang tel nidanga kan hmuh loh ang, kan han hmu a. Chutah Myanmar buaina avanga khilam buaina nen, Refugee lo kalchho nen, kangmei nasa tak chhuak nen, harsatna chitin rengin min tlakbuak a, mahse heng zawng zawng hneh theihna leh heng chunga a vantirhkoh khandaih tawptir theitu kha kan auhchhuah a, Atan kan thawh phawt chuan, hmanrua tur chu lei leh van, leilung leh a chhhunga thil awm zawng zawng hi ka ta a ni, India pawisa zawng zawng vaibelchhe tel hi a ta a ni. Khawvela mi a dangte nen, chung chu hman turin min pektir theitu a ni. Pharo-a Israel fate tibuaitu leh Sala chhawrtu, khami hausakna zawng zawng kha kum 40 an vahvaih chhunga an hman tur tumtu chu Pharoa Aigupta sawrkar a ni. Chuvangin Mizorama chanchintha kan hrilna tur atana min buatsaihna turin, hmana Jet-Fighter rawn tirtu leh Grouping center-a mipuite min tibuaitu khan min tum dawn a ni. Chuvangin leilung leh a chhunga awm zawng zawng, India Bank leh an central budget zawng zawng neitu hian 'ka ta a ni,' a ti. chungho hnenah chuan 'pe rawh u' a tih chuan, 'India rama thuneitu ber ka ni,' a ti lo. 'Lei leh Vana thuneihna zawng zawng ka hnenah pek a ni tawh,' titu khan a ni. Amaherawh a duh ber chu, ama tana thawh a ni e. chuvangin, ka tan in thawh dawn chuan hmun tina chanchintha hril tura inkal dawn chuan, Leilung leh a chhunga thil awm zawng zawng neitu, Lei leh Vana thuneihna zawng zawng neitu hi kumkhuain, khawvel tawp thleng pawhin, in hnenah ka awm dawn a ni a tih kha, he covid hmanga kan Pathian hian 'tunah ngaithla rawh u, thu ka sawi dawn e,' a tih hi, Zoram mipuite hi kan remna ni-ah min hrilh niin ka hria, chu thinlung nen chuan Zoram zawng zawnga mipuite, hawh u, Pathian lam i hawi leh ang u, kan thehtawpin tawngtai ila, tunah mi tam takin Lammual zawlah te tawngtai ila, kan Pathian hi i au ang u, sawrkar hian han ti teh u, an ti a, a dikna chen a awm e, a lawmawm pawh a lawmawm e. Amaherawh chu heng Kohhran hna hi chu, sawrkarina order nena kalpui chi a ni lova, kan Kohhran hotuten ti sela, Mizoram Kohhran Hruaituten an ti ang a, tin, a tih pawh an ti mek bawk a ni. Pawn lama langsar taka khawvel hmaa ropui taka Pathian han auh pawh a chakawm, mahse, tun hunah chuan kan tih theih chintawk chu, ‘I pindan chhungrilah lut la, chutah chuan tawngtai la, a ruka lo ngaithlatu Pathianin a chhang ang che’, a tih hun kha niin ka hria. Chuvangin tun hunah hian kan awmna hmun theuhah a ruka min lo ngaithlatu hnenah tawngtai ila, Ama tana thawk turin kan inpek phawt chuan kumkhuain khawvel tawp thleng pawhin in hnenah ka awm ang, engkim ka nei titu kha, Ama tana thawk turin Zoram hi tun covid hian min buatsaih rawh se, tih kha tun Remna Ni puala Zoram mipui hnena ka chah duh ber chu a ni.
He kan Remna Ni-ah hian ngaihtuahna thar nen i thlir ang u. Zoram mipui zawng zawng kan dam theihna turin duhsakna ka hlan che u a, kan Pathianin min vengin min hruai zel ang tih ka ring a, kawng chanveah Zoram Kristiante hi a hnathawk tur hian min kalsan lovang tih i ring tlang ang u. In vaiin Remna Ni chibai ka buk a che u.
Ka lawm e.
Attachment
- Loading attachment...
