Republic Day 65-na chu ramchhung hmun dangte rualin Mizoram pumah vawiin khan hman a ni a. Mizorama a lawmna pui ber Aizawl Sipai Lammuala neihah chuan Mizoram Larsap Pu Vakkom B. Purushothaman chuan tukin zing dar 7:30 khan hnam puanzar pawt pharhin, parade contingent 23-te chibai buk chhangletin, Republic Day thuchah a sawi a ni.

Minute 15 chhung thuchah a sawiah Larsap chuan he ni lawm tura pungkhawm zawng zawng leh Mizoram mipuite hnenah a duhsakna hlanin kumthar chibai a buk a. Kum kalta chhunga Sorkar hmalakna tlangpui a sawi a ni.

Larsap chuan tun hnai maia MLA inthlanpui neih zawh takah boruak muanawm leh zalen tak kan neih theih avangin mipui hnenah lawmthu a sawi a. Sorkar hmalakna pui ber NLUP chu phur leh thatho taka chhunzawm zel a nih tur thu te, National Food Security Mission hmanga buh chingtu te mamawh khawl leina sum ruahman sak a nih thu te, Industrial Area Development kalpui tan mek a nih thu leh State chhunga block 4-ah tuialhthei laichhuak tur a hmalakna kalpui mek a nih thu te a sawi a.

Kawlpethaa Mizoram intodelhtir atana hmalakna te Larsap chuan sawilangin, 210 MW pe chhuak thei Tuivai HEP dinna turin Viability Gap Funding (VGF) hmanga Public Private Partnership (PPP) mode-a thawh chu Sorkar laipuiin a remtih thu leh, he project hi India hmarchhak a PPP mode hmanga kawlpetha siamchhuah hmasak ber a nih mai bakah, VGF suma ram pum huapa hmasa ber tur a nih thu te, 12th Plan chhunga zawh hman tum a nih dan leh, state dung leh vanga kawlpetha thawn darhna chen a Sorkarin a kalpui dan a tarlang a ni.

Mizoram Sorkar UD&PA hmalakna a tunhnaia Sorkar laipuiin lawmman pahnih a pek chungchangah Larsap chuan he Department thawktute chungah lawmthu a sawi a. Mizo mipui tana tui in tur thianghlim ruahman dan te, hriselna lamah Medical College puitling nei tura bawhzui dan te, zirna leh thalaite tana infiamna kawng hrang hrang hmachhawpte sawi langin, Sorkar programme hrang hrang MGNREGS, IAY, SSA leh Olympic Vision 2016 te kalpui dan te pawh a thusawiah hian a tarlang a ni.

Larsap chuan Kohhran te, tlawmngai pawl te leh mipui vantlang hnenah Sorkara rinna an nghah avang leh Mizoram hmasawn nan kawng tinrenga a hmalakna an tawiawm avangin lawmthu a sawi bawk a ni.

Vawiin Sipai Lammuala Republic Day lawmnaah hian Chief Minister Pu Lal Thanhawla bakah Minister-te, Parliamentary Secretary-te, MLA-te, official-te, zirlaite leh mipui thahnem tak an tel a. Parade contingent titha te leh he ni puala infiamna chi hrang hranga lawmman dawngtute hnenah Larsap chuan lawmman a sem bawk a ni. Lammuala lawmna inkhawm zawhah hian Larsap chenna Raj Bhavan-ah sawmbikte tan thingpui ruai buatsaih a ni.

Attachment

  • Loading attachment...