3352/2022-2023

Champhai, the 26th January, 2023: India ramin mahni puala duan ram danpui a neih champhaphak hriatrengna leh lawmna India Republic Day vawi 74-na, naktuk January ni 26, 2023 a Chhangphut Field, Champhaia neih tur inpuahchahna kalpui chu vawiin khan hmawrbawk fel niin, Champhai chu Republic Day lawm turin a inpeih tawh a ni.

Parade contingent leh Republic Day lawmna puala inpuahchahna hnunhnung final rehearsal chu vawiin chawhma dar 10 khan Chhangphut Field-ah neih zawh fel niin, a lawmna tur hmun Chhangphut Field hmunhma cheibawl leh buatsaih pawh zawh fel a ni bawk a, mawhphurhna nei tura ruat hrang hrangte pawh an inpeih hlawm tawk bawk.

Naktuk January ni 26, 2023 Ningani chawhma dar 10 hian Chhangphut Field-ah Champhai District Bawrhsap Pu James Lalrinchhana hovin Republic Day lawm a ni dawn a. Zing dar 6 ah sawrkar pisa, zirna leh mimal in-ahte hnam puanzar pawtpharhin Republic Day lawmna ropui taka neih tum a ni a. Republic Day lawmna hunah hian faina kawnga tithate leh DC's Trophy Champhai District Chess Tournament 2023 lawmman sem chhuah a ni dawn bawk.

Republic Day lawmna hun hi a hmuna kal remchang lo te tana thlir theih turin Local Cable TV pahnih; CCN (CCN1 Channel) leh LCN (LCN Zokhawpui Channel) ah te thlir theih tura ruahmanna siam a ni bawk.

Chhangphut Field-a hun hman zawh hnu hian chhun dar 12 ah Jericho Garden, Keifangtlang-ah sawm bikte pualin VIP's At Home neih a ni dawn a. Republic Day lawmna puala buatsaih CDFA 2nd Division Football Tournament Final chu chawhnu dar 2 ah New Champhai leh Vengthar Team te'n an khel ang.

Kumin Republic Day lawmnaah hian Parade contingent 18; Armed contingent 1, Unarmed Contingent 5 leh School Contingent 12 te bakah Aizawl atangin Govt. Mizo High Sçhool Pipe Band-te an tel thei dawn a, Pipe Band display an nei nghal dawn bawk a ni. District Level Republic Day Celebration Committee chuan ropui taka Republic Day lawm anih theih nan mahni chanvo theuh hneh taka hlen turin mawhphurhna latu zawng zawngte a ngen a, Republic Day chu India ram ni pawimawh bik anih avangin sawrkar hnathawk, zirlai leh khawtlang mipuite chu he hun hi ngaipawimawha tel vek turin a sawm a ni.