Thian duhtakte u,

Kumin Republic Day vawi 76-naah hian Khawzawl District mipui zawng zawng te chibai ka buk vek a che u; he ni ropui tak kan thleng leh thei hi lawmawm ka ti takzet a, hlim tak leh lawm taka hmang theuh turin duhsakna ka hlan a che u.

January ni 26, 1950 khan kan ram hi mipui rorelna ram, intluktlanna leh zalenna ram, mi tinin dikna chanvo kan neih theihna ramah kan hruaitu ten an lo siam tawh a, chuta tanga kum 75 hnuah chuan India ram chu ram ropui leh zahawm tak, khawvel puma ram pawimawh tak leh thil ti thei tak a lo ni ta a, ram hruaitute leh mipui thawh rimna zarah hriselna kawngah te, zirnaah te, eizawnnaah te leh thil dang tam takah India ram pumpui hian hma a sawn nasa takmeuh a ni.

Khawzawl District pawh kum 2019 a din a nih atang khan hma kan sawn chak em em a. Hand Holding Policy, Bana Kaih Policy kan tih, kan Sawrkar flagship programme hi kan rama kut hnathawktute tihhmasawnna tura ruahmanna a ni a. Department hrang hrang - Agriculture and Farmers Welfare Department te, Horticulture Department te, Rural Development Department te, Irrigation and Water Resources Department te, Sericulture Department te, Fisheries Department te, KVK leh FOCUS hnuaiah te kut hnathawktute tihhmasawnna turin kan District chhungah Scheme hrang hrang hnuaiah nasa taka hmalak a ni a. Kut hnathawktute hriatna leh thiamna belhchhah turin training hrang hrang pek an niin thlai chi leh thlai tiak chi hrang hrang kut hnathawktute hnenah sem a ni a, chhungkaw tamtak hnenah tanpuina pek a hnathawktute hnathawhna ni. Kut hmunhma tichangtlunga, tihmasawn turin kawng hrang hranga hma lak a ni bawk.

Kut hnathawktuten an thlai thar chhuahte felfai leh hlawk zawka an hralh a, kumtin harsatna tawk lova ruahmanna leh kaihhruaina awmsa hmanga an hmuh tur zat hre lawka thlai an chin theihnan thlai thar hralhna mumal tak leh ngelnghet tak siam turin theihtawpa hma lak mek a ni a. Village Council zawng zawngah Multipurpose Farming Society din vek a ni tawhin Secondary Collection Centre tur pawh ruahman fel a ni tawh bawk.

Dan leh thupek kenkawh kawnga Police hmalakna hi a chhuanawm takzet a. Kan District chhung a ralmuangin a muanawm a, buaina liantham sawi tur a awm lo. Krismas leh kumthar vuakveta halpuah leh halmawi hal lo tura Sawrkar thupek tha taka kenkawh a nih avangin Police, Magistrate duty leh NGO hrang hrangte chungah lawmthu ka sawi takmeuh a ni.

Hmasawnna ruhrel lian tham din kawngah pawh kan District chhunga chak taka hmalak a ni hi lawmthu ka sawi takmeuh a ni. Public Works Department-in hmun hrang hrangah kawngpui sial leh thawmthat hna chak takin an kalpui a. Khum 50 awm theihna tur District Hospital leh Quarters te sak mek a ni a, Community Multipurpose Hall, Khawzawl Zuchhip Vengah leh Auditorium, Khawzawl Vengtharah te sak mek a ni bawk. District Panchayat Resource Centre sak mek a niin Biate Tea Tourism and Nature Camp pawh chak taka hna thawh a ni a, Khawzawl Darngawnah leh Khawzawl Vengtharah te Futsal Ground siam a ni a, hmasawnna ruhrel dang engemawzat kalpui mek a ni.

Ruihhlo do kawngah chak taka hma lak a ni a. Excise and Narcotics Station December ni 11, 2024 a hawn a lo ni ta hian ruihhlo do kawngah nasa takin chakna thar min pek ngei ka beisei. Ruihhlo do kawnga NGO hrang hrangte hmalakna a chhuanawm takzet a, lungrual taka kan thhawhho zel chuan ruihhlo kan do hneh ngei ang tih ka beisei tlat a ni.

Zirna tha zawk kan neih theihnan theihtawpa hma lak a ni a. Eklavya Model Residential School, Khawzawl Darngawn venga dinna tur pawh Prime Minister zahawm takin lungphum a phum tawh a, hna hi tan thuai theih beisei a ni. Information chak zawk leh awlsam zawka kan inpek chhawn zung zung theihnan NIC Distric Centre, Deputy Commissioner Office- a bun fel thuai tura hma lak a ni.

Kan hmeichhiaten an mamawh huna tluk luhna tur hmun One Stop Center kan nei ta hi thil lawmawm tak a ni bawk. Chhungkaw harsatna avanga sikul kal ve thei lo leh zirna chhunzawm thei ve lote tan Sawrkar Laipuiin sponsorship dawng thei turin naupang 140 min approve sak a, sponsorship hi an hmuh thuai theih nan chak taka hma lak mek a ni. Ministry of Social Justice and Empowerment atangin ALIMCO kaltlangin rualbanlo mi 127 te tan hmanraw chi hrang hrang 174, Rs.13,14,513.00 hu dawn a ni bawk.

Him leh lungmuang taka an khawsak theihnan Shelter for Urban Homless hnuaiah in engemaw zat sak tum a ni a, PMAY hnuaiah in 2045 sak tum a ni a, PMAY-G hnuaiah in 473 sak tum a ni bawk. Ni 100 inhlawhna kan tih mai, MGNREGA hnuaiah kumin Sawrkar tangka kum chhung hian chhungkaw 8643 te hnenah ni 93 inhlawhna siam sak an ni tawh bawk.

Chhungkaw tinin tui thianghlim in tur kan neih theihnan theihtawpa hma lak a ni a, faina leh thianghlimna kawnga hma kan sawn zel theihnan hma lak a ni. Khawzawl District hi hman khat daih plastic hman lohna District a kan siam thuai ka beisei tak meuh a ni.

Kan District chhunga hmasawnna hrang hrang te hi sawi vek sen a ni lovang a, tuna ka sawi lan tak atang khan kan district-ah hian hna tha tak tak thawh mek a ni tih a lang chiang em em a, mipuite tana malsawmna a nih ngei ka beisei a ni.

Vawiin Republic Day kan lawmna atana rim taka thawktu zawng zawng te chungah lawmthu ka sawi a, Parade Contingent zawng zawngte chungah lawmthu ka sawi a, Khawzawl District-ah a vawikhatnan Pipe Band kan nei thei ta hi lawmthu ka sawi tak meuh a ni.

Thian duhtakte u, Vawiin Republic Day-ah hian kan ram Danpui, kan Constitution hlutzia leh ropuizia hi hre thar leh ila, kan dikna chanvo humhim zel turin intluktlanna te, inunauna te, inhriatthiam tawnna te nei zel ila, kan district hmingthatna leh hmingmawina atan theihtawp chhuah zel turin mipuite thinlung takin ka sawm che u a ni.

Ka lawm e.

JAI HIND