Vawiin India Republic Day vawi 76-na ni ropui takah hian Saitual District mipuite leh helai hmuna lo kalkhawmte, ram puma India khua leh tui zawng zawngte duhsakna chibai ka buk a che u.
January ni 26, 1950 atang khan India Danpui (Constitution) chu a taka hman tan a lo ni ta a, he ni hi India khua leh tui te zawng zawng te tan ni ropui leh chhinchhiah tlak tak a ni. He Danpui kan hman aṭangin India ram chu mipui thlante rorelna (democracy) ram lian ber kan lo ni thei ta a, he Danpui hian India ram khua leh tui zawng zawng te tan dikna, zalenna, intluktlanna leh inunauna min pek bakah ei leh bar intodelhna leh mipa leh hmeichhe intluktlanna thlengin kawng min hawnsak a ni. Chuvangin, vawiinah hian kan ram tana sulsutu hmasate, zalenna min thlen a, Danpui tha tak min siam sak tute hre rengin, zahna chibai buk theuh ila, kan ram danpui ngaihlut leh zahna lantir hi mitinte tihmakmawh a ni tih hre thar turin mipuite ka chah duh che u a ni.
He hun lawmawm takah hian kum kalta chhunga Saitual District-a Sawrkar hmalakna thenkhat te han tarlang ila:-
1. Dan leh thupek kengkawhtu kan District Police te inpekna a chhuanawm hle a, kum kalta chhung khan case 35 ziah luh a ni a. Saitual DEF chuan Heroin (No.4) gram 669.57 an man a, sum a chan tir chuan cheng Rs. 3,56,600/- man hu vel zet a ni. Zu hi Rs. 2,63,500/- man hu litre 647 an man a, dan lova kuhva tawlh ruk hi Rs. 28,08,250/- man hu bag 1470 an man bawk a ni. Saitual DEF chuan awareness campaigns/programme chu school, biak in leh community hall-ah te heng ‘Traffic rules’, ‘Career counselling’, ‘Cyber crimes/awareness’, ‘POCSO Act’, ‘Three new criminal Laws’ leh ‘Drug abuse’ tih thupui hmang tein vawi engemaw zat an nei a. Phullen khuaah hian Beat post hi ni 21.05.2024 khan sak a lo ni tawh bawk a ni.
2. District Hospital, Saitual chu tihchangtlun zel a ni a, tun hmaa la neih ngailoh Investigation khawl thar tha tak tak te neih belh a ni. July 2024 atangin HMIS (Hospital management Information System) hman a ni a, hemi hmang hian damlote chanchin zawng zawng Computer a dah luh thin a ni. Non-Communicable Diseases programme hnuaia tih tur hrang hrangte zingah kan population atanga chhuta entur zat hi 93-100% endik an ni tawh bawk a, 100% tur hian hmalak mek zel a ni. Saitual District chhungah naupang vaccine lak tur la kim rate hi 97.28% a ni.
3. School Education Department leh Samagra Shiksha scheme Saitual District hnuaiah zirnain hma a sawn theihna turin theih tawpa hma lak a ni a, District chhunga School building awngrawp tawhte sak that niin school thuam that ngaite thuam that a ni bawk. Kut Themthiamna (skill) eizawnna tlak zirlaiten an neih theihna turin Vocational Education course kalpui mek a ni. NIPUN Bharat hnuaiah zirlai naupang kum 3-9 inkar ten ziak, chhiar leh chhiarkawp an thiamna turin Govt. Primary School engngemaw zatah Teaching Learning Materials leh Educational Toys thahnem tak pek an ni. School hrang hrangah Computer set, Printer, Projector, Web Camera, Smart Interactive Board Screen, UPS leh infiamna hmanrua chi hrang hrang sem a ni. Govt. leh Govt. Aided School-a naupang 2152 hnenah uniform leh 2395 hnenah textbook a thlawna pek a ni. PM Poshan scheme hnuaiah zirlai 4692 te hnenah Chhun Chaw – Mid Day Meal tuihnai tak nitin pek thin an ni bawk.
4. Tui thianghlim leh hnianghnar mitinin kan neih theih nana hmalatu PHED, Khawzawl WATSAN Division hmalaknain JJM hnuaiah Saitual District chhunga thingtlang miten tui connection an nei vek tawh a. AMRUT 2.0 hnuaiah Saitual khawpuiin chhum lo chat lo a tui hnianghnar kan dawn nan Bahra Lui leh Khuai Lui tui te lak a ni. Swachh Bharat Mission-Grameen (SBM-G) hnuaiah Saitual District a thingtlang khaw 40, ODF+ Model Village-a puanah te Community Soak Pit te, Composed Pit te leh Plastic Collection Centre te sak vek tawh a ni.
5. Inkalpawhna kawngtha nei tura hmalatu PWD, Saitual Division chuan kum kalta chhung khan formation cutting (7.360 km), Black top (Flexible Pavement) (20.350 km), Concrete Pavement (7.470 km), Culverts (CD Works) (38km) leh Protection works (133 km) te an khawih a ni.
6. Kut hnathawktute hmasawnna atana hna thawk thin Agriculture Department chuan Saitual District chhungah Rainfed Area Development (RAD) hnuaiah chhungkaw 60 te hnenah farming system atan tanpuina Rs.25000 theuh a pe a. District chhunga Tung chingtu chhungkaw 143 te hnenah tanpuina atan Rs.19,42,500/- a pe chhuak bawk. Hei bakah hian kuthnathawk tuten thal laia an rama thlai an chin theihna turin, chungkaw hrang hrang 95 te tan tui dah khawlna (water harvesting structure) chu siamsak an ni. Kuthnathawk tute chawikanna atana Sorkar policy "Agriculture Marketing" kalpui mek hnuaiah hian Secondary Collection Centre (SCC) chu hmun thum- Saitual, Keifang, leh Hliappui ah siam niin, heng SCC pathum te enkawla buaipui tur hian Multipurpose Farming Society (Sihfa, Mualpheng leh Hliappui) te chu ruat an ni.
7. Ei leh bara mipui an intodelh theih nan Horticulture Department hnuaiah thlai chi thahnem tak sem a ni a, thlai leh thei chi hrang hrang- tomato, zikhlum, thingfanghma, dawnfawh, aieng leh mau te chu khaw hrang hrangah chin a ni bawk. Multipurpose Cooperative Farming Society chu Village Council 44-ah din niin, Sawrkarin a ngaih pawimawh thlai- sawhthing, aieng leh hmarcha chingtute zinga hamthatna dawng thei tute data lakkhawm a ni a, Dragon fruit chingtute hnenah hmanruate sem chhuah a ni. Thlai chingtute tana tui dah khawlna tur Pre- Fabricated Geo-lined Water Tank Unit 60 leh tui pekna tur Drip & Sprinkler Irrigation System System, Unit 57 te chu khaw hrang hrangah siam a ni a. Heng bakah hian Pack House, Greenhouse leh Warehouse cum Collection Centre te chu khaw hrang hrangah din a ni.
8. Fisheries Department chuan PMMSY Scheme hnuaiah dil thar laihna tanpuina sum chu beneficiaries te hnenah Rs.5040/- theuhin an sem chhuak a, sangha dil khawi lenna (rearing pond) laihna atan beneficiaries 25 hnenah Rs.75,600/- theuhin tanpuina sem chhuah a ni bawk. Fisheries Department chuan Saitual District chhunga sangha khawitu ten sangha tam zawk an thar chhuah theih nan sangha chi leh chaw thahnem tak an lo sem chhuak tawh a ni.
9. Sericulture Department, Saitual hnuaiah hian pangang vulha eizawng hi chhungkaw 150 vel an awm a, heng pangang chi 3 - Muga, Eri leh Mulberry te hi an vulh vek ani. Silk Samagra-2 project hnuaiah hian beneficiaries 45 te hi Land Development tur atan financial assistance pek chhuah an ni tawh a. Rearing house sakna tur sum hi pek chhuah kim ni tawhin, farmers te pawn an sa zo vek tawh a ni. Augmentation on Muga Culture hnuaiah Beneficiaries 40 thlan ni in Mountage Hall in sakna tur pek an tawh a ni.
10. DMU-FOCUS hnuaiah hmeichhiate tana hnathawh awlsam nan vawkchaw channa, vaimim nuaina, puanthui khawl, buh vuakna khawl leh garden tools hrang hrang te chu chhungkaw thahnem tak te hnenah pek a ni.
11. AH & Vety Department chuan bung thar a kai theih nan District Veterinary Hospital building leh Doctor’s quarter pahnih (2) sak zawh tawh chu December ni 17, 2024 khan Pu Lalsawivunga AH & Vety Minister chuan a hawng a. AH & Vety Department chuan ran vulh tute tan hmasawnna leh hamthatna tam tak a chhawp chhuahsak a. Kum 2024 April– 2025 January chhung hian ran damlo 9,650 enkawl niin, ran hri danna (Vaccine) hmangin 1,191 ran chiu a ni bawk. ASF vanga vawk suat (Culling) chhungkaw sawmpariat (18) te hnenah 76,550/- an sem a ni.
12. District Rural Development Office hnuaiah Job Card holder 12,238 te tan December, 2024 thleng khan inhlawhna ni 90 chhung siam sak an ni. PMAY-G hnuaiah beneficiaries 393 te chu insak tanpuina pek an ni a, PMKSY WDC 2.0 hnuaiah balhla, limbu leh hmarcha te chin niin, a enkawlna tur terrace leh tui dahkhawlna te siam a ni bawk. RD Office chu Horticulture Department leh MzSRLM nena tangkawpin N. Khawlek leh Phullen RD Block-ah Food Grain Storage leh Ginger Processing Unit- te an sa a ni.
13. Urban Development & Poverty Alleviation Department (UD &PA) hma laknain Swachh Bharat Mission (Urban) hnuaiah Saitual Town chu pawn/khawlaia inthiar awm lohna Open Defecation Free-ah puan a lo ni tawh a, Open Defecation Free Plus (ODF+) certify hial a ni tawh bawk a Community/Public Toilet hi kumin hian Saitual District chhungah panga (5) sak a ni a. PMAY-Housing for All (Urban) hnuaiah mi 403 te chuan tanpuina an dawn atang in an sa zo tawh a, DAY-NULM hnuaiah kut them thiamna chi hrang hrang- cake ur, puan thui, sam leh hmel chei mawi training te buatsaih a ni a. SHG te tan pangpar khawi, chips siam, kuttah design thlan, lei tha siam training pek an ni a, NULM Festival-ah hian SHG te chu an kutchhuak phochhuahna leh hralh chhuahna hun siamsak a ni
14. Mission Shakti chu August ni 23, 2024 khan Saitual District-ah hawn niin, Women and Child Development hnuaiah District Hub for empowerment of women (DHEW) office chu nikum August vek khan hawn a ni bawk. DHEW chu Mission Shakti hnuaia scheme hrang hrang te tih hlawhtlinna kawnga hma latu a ni a. ICDS Project hnuaiah Saitual District chhunga khaw 40 tuamin, PMMVY hnuaiah hamthatna dawngtu thahnem tak an awm a ni. Hmeichhe baihvaite tluk luhna tur- Once Stop Centre siam niin, hmeichhe mangang leh puih ngaite an mamawhna zawnah tanpuina pek zel an ni.
15. District Child Protection Unit, WCD hnuaiah naupang harsa leh enkawl ngai te an lo intundin theih nan naupang 150 hnenah he sponsorship cheng 84,96,000/- pek chhuah a ni tawh a. Kum kal ta chhung hian home-pahnih kum tlinglo dan kalha che te dahna “Observation Home” leh naupang tanpui ngai leh baihvai te dahna “Serenity Boys Home” din a ni a, home a thawk tur te pawh lak fel an ni tawh. Hlimna In Girls Home-ah hian April, 2024 atanga January, 2025 chhung hian naupang 19 an enkawl a ni. Naupang dikna chanvo leh humhim an tulna kawnga hma lak dan tur zirtirna Awareness Campaign, Sensitization Programme leh Capacity Building Programme chu Police leh khawtlang hruaitu mai bakah naupang venhimna kawnga thawktute hnenah Saitual District chhunga khaw hrang hrangah vawi 30 neih a ni a.
16. Saitual Treasury Office hnuaiah tunah hian DDO 25 an awm mek a, April 2023 atanga sorkarin IFMIS hmanga bill siam vek tawh tura thuchhuah a siam angin DDO te hian an hmang thei vek tawh a. Saitual Treasury ah hian December, 2023 atangin Pension Payment pek tan a ni.
17. Deputy Commissioner of State Tax, Saitual Zone chuan kum kalta chhungin GST cheng 5,58,41,935 an khawn a, Profession Tax cheng 17,84,562 hmuin, VAT cheng 68,95,476 an khawn khawm bawk a ni. Cess under VAT hi cheng 2,63,736 niin chhiah zawng zawng tling khawm hi cheng 6,47,85,709-a ni.
18. District Civil Supply Office, FCS & CA Department hnuaiah December 2024 atang Saitual Town Area-ah LPG home delivery kalpui tan a ni.
19. Land Resources, Soil & Water Conservation Department chuan Leilet tuilianin a ti chhe tur venna “Gabionic Spur” leh dawhfawh chinna tur “Bench Terrace” chu Lamzawlah an sa a ni.
20. Information & Public Relations Department chuan Saitual District-ah nikum chhung khan Press Release 150 chuang an tichhuak tawh a, Saitual District chhunga sawrkar hmalakna leh hmachhawp puanzar kawngah hna tangkai tak an thawk mek a ni.
21. Deputy Commissioner office chuan District hmasawnna atana department hrang hrang hna thawhte khai khawmin, mipui mamawh hrang hrang ngaihtuah leh pek chhuah hna a thawk thin a. Hmasawnna hna kalpui nana ram lak chungchang te, zin mite leh ram dang atanga lo kal tan ILP pek chhuah te, dan anga silai leh a mu leh puak thei thil kawl leh hman phalna pek chhuah te, khua leh tuite tana certificate pawimawh pek chhuah te buaipuiin, chhiat rupna leh rikrum thil a thlen changin a tul angin hma a la vat thin a. District hmasawn nan DC Office chu Department, pawl, kohhran leh khawtlang hruaitute nen thawhhona tha kan nei thin chu lawmawm ka ti a, kawng hrang hrangah thawhhona tha tak kan neih zel theih ka beisei.
Awle, vawiin Republic Day hlawhtling taka hman a nih theih nana tha leh zung senga mawhphurhna hrang hrang hlen tute, Department hotute, tlawmngai pawl hrang hrang te, kohhran hruaitute, zirlaite leh media lama ka thawhpuite chungah min tawiawmna leh thawhpuinaah lawm thu ka sawi a, he ni ropui tak hmang tura lo kalkhawm zawng zawng te chungah lawmthu ka sawi bawk a ni.
A tawp berah chuan kan ram Danpui huam zauzia leh hausakzia hriaa ngai hlu lehzual turin khua leh tui zawng zawngte ka sawm a. Kan Danpuiin min hrilh angin India ram ropui taka hnam hrang hrang te inpumkhatna leh inunauna kan vawn nun zel a pawimawh tih i hre thar leh theuh ang u.
