Vawiin khan Champhai Chhangphut Field-ah India Republic Day vawi 67-na chu ropui taka hman a ni a, Champhai Bawrhsap Pu Vanlalngaihsaka chu khuallian a ni. Zing dar 10:30 AM-ah Khuallian hian Hnam Puanzar pawtpharh in, parade contingent 30-te Hnam Puanzar chibai bukna a changlet a ni.

Thusawiin khuallian chuan mipuite chu Republic Day chibai a buk a; kumin Republic Day vawi 67-naah hian sakhaw biak hrang hrang nei, tawng leh hnam ze hrang hrang hmang zawng zawngte len tlan vekna Ram Danpui siamtute zara kan nihlawhna chu chhut tham fe a nih thu a sawi a. India ramin kawng hrang hrangah nasa takin hma a sawn rualin Mizoram pawhin hmalam a pan zel thu sawiin Champhai DC chuan District chhunga Sorkar Department hrang hrangte hmalakna a tarlang a. Sorkar Flagship Programme NLUP chu thawh thumna leh thawh li-na kalpui mek a nih thu te, Dan leh thupek kenkawh chungchanga Police-te thawhrimna azara kum 2014 aiin kum 2015-a Police Station-a Case Register chu 33 laia a tlak hniam thu te, Greater Champhai Water Supply Scheme hnuaia chhungkaw 3,700 hnenah tui connection pek a nih tawh thu te a sawi a. Zirna lamah hmasawnna hmuh tur a awm zel a, Board Examination leh Combined Civil Service Exam-ah te lang pha District atang an awm thin thu te leh Swachh Bharat Mission hnuaia a kaihhnawih Department-te hmalakna azara khawpui chhung leh thingtlangah faina leh thianghlimna in hma a sawn zel thu te a sawi tel a ni.

Khuallian chuan Champhai District hi a ram leilung a rem vang leh thing leh mau mawi tak tak a awm vang te bakah PiPute sulhnu tam tak leh tun hnua din thar en tur thahnem tak a awm vangin Mizoram chhung mai bakah ram pawn atang te pawhin tlawhtu an awm thin thu te a tarlang a. Hengte avang hian Champhai District chu a chhunga cheng mipuiten mi tin tlawh chak leh hmuh chak, an lo kal pawha nuam an tih em em, a kal tawh ten an tlawh leh chak em em tur "Destination Champhai" ah siam turin kalkhawm mipuite chu tan la theih turin a sawm a ni.

Khuallian hian thu a sawi zawh hian School Contingent tithate hnenah lawmman a sem nghal a. Kumin Republic Day lawmnaah hian Armed Contingent pakhat (2nd IR Bn. Khawzawl), Unarmed Contingent pasarih, School Contingent 21 leh Pipe Band pakhat (Govt. Vengthlang M/S)-te chu Parade Commander SI Lalsangzuala Sailo chuan a kaihruai a ni. BC English Academy Girls' Contingent chu pakhatna an ni a, Bethel Mission School Boys' Contingent chu pahnihna niin Bethel Mission School Girls' Contingent chu pathumna an ni a. Contingent dang zawng hnenah Participation Prize pek an ni.

District Education Office-in District Level Essay Writing Competition, "National Integration and Communal Harmony for School Children" tih thupui hmanga January ni 18, 2015 a buatsaih a titha zual pathum hnenah DC hian a lawmman a hlan nghal bawk. Parade-ah hian Ex-Servicemen Contingent an tel bawk a. An zinga kum 80 chung lam awm pahnih chuan Champhai SP Pu RP Meena hnen atangin Certificate of Appreciation an dawng a ni.

Republic Day vawi 67-na pual hian Champhai 1-ah Football Tournament buatsaih a ni a. He intihsiakna ah hian final match-ah Vengthlang leh Bethel Veng te intum in, Champion team te hnenah hian Champhai SP Pu RP Meena chuan trophy leh lawmpuina pawisafai bakah Certificate a hlan a. Lawmman pahnihna hi DSYO Pu Lalngilneia Colney chuan a sem bawk.

Chhangphut Field-a Republic Day lawmna pui ber neih a nih hnu hian DC Bungalow tual Jericho Garden-ah Champhai Bawrhsap chuan sawm bikte tan At Home function a buatsaih a. Tlai lamah Office hrang hrangten tanpuina sum an thawhkhawm chu heng - District Hospital Poor Fund, Shelter Home, TNT, Emmanuel After Care Centre, Metakhen, Genesaret leh Grace Receiver Home-ah te Deputy Commissioner hovin Champhai Officers' Club ten an hlan a ni.