4156/2025-2026

Dated Khawzawl, the 26th January, 2026 : Vawiin chawhma khan India Republic Day vawi 77-na chu Mualvawm Field, Khawzawlah ropui taka lawm a ni a. Khawzawl bawrhsap Pu K. Vanlalthiana chuan he hun hi khuallian niin a hmanpui.

Zing ni chhuah rualin sawrkar pisa leh hmun pawimawh dangah te India Ram Puanzar zar a ni a. Zing dar 8-ah Mualvawm Field-ah Khuallianin Ram Puanzar pawt pharhin, Ram Puanzar chibai buktu parade contingent 15 te chibai buk a chhang leta, Republic Day thuchah a sawi nghal a ni.

Khuallian Pu K. Vanlalthiana chuan Khawzawl District mipuite chu chibai bukin, Republic Day chu India ram inrelbawl nana Danpui (Constitution) kan hman tan ni a nih thu a sawi a. Kan ram Danpuiin zalenna leh intluktlanna min pek hi vawng hima, inlungruala, indawmkang tawnin, kan ram hi ram nuam leh changkanga siam turin kalkhawmte a sawm a.

Khuallian chuan sawrkar kum kal mek chhunga Khawzawl District-a hmasawnna hna thawh tlangpui tarlangin, an hna thawh chhuanawm a tih thu a sawi a. Hand Holding Policy hnuaiah kuthnathawktute tihmasawnna turin nasa taka hmalak a nih thu a sawi a. Police-ten dan leh thupek tha taka an kenkawh avangin District chhung a ralmuan thu a sawi a. Cheng vaibelchhe sawm man Circuit House leh Revenue Quarters sak mek a nih thu leh District Research Office tichangtlun hna pawh thawh mek a nih thu a sawi a. District Transport Office leh DC Office ah Revenue Branch hawn fel a nih tawh thu te, Treasury Office leh Quarters cheng vaibelchhe 3 man te, Sialhawk Multipurpose Hall cheng vaibelchhe 2 man te, Demdum to Tuichang Pump House cheng vaibelchhe 3 man te hna tan thuai theih beisei a nih thu sawiin, Cheng vaibelchhe 15 man tur Mini Secretariat Complex ruahmannna pawh chak taka kalpui a nih thu a sawi a.

Khuallian chuan hriselna kawnga hma kan sawn theihnan nasa taka hmalak a nih thu sawiin, khum 50 awm theihna tur District Hospital leh Quarters sak hna chak taka kalpui a nih thu te, Chief Medical Officer, Respiratory Medicine leh Paediatrics Doctor kan neih tawh thu te a tarlang a. September 19, 2025 khan Multi Speciality Clinic buatsaih niin, mi 5640 an inentir thu a sawi bawk a. Thingtlang in 4910-ah functional tap water connection pek an nih tawh thu te, Tualpui Water Supply Scheme pawh chak taka bawhzui a nih thu leh Hmuncheng Solar Pumping Scheme pawh hawn thuai theih beisei a nih thu a sawi bawk a. Kawlphêtha hnianghnara mipuiten an dawn theihnan Tualpui Power Supply pekna leh Kawlkulh khaw chhunga Power Supply pek chhuahna cheithat leh tichangtlun hna pawh thawh zawh a nih tawh thu a tarlang a.

Tualpuiah September 16, 2025 khan Lozawhpui ropui taka hman a nih thu tarlangin, hetianga kawng hrang hranga hmalakna hian khualzinte a hip mai bakah kut hnathawktute tan beiseina leh tumruhna, taimakna thar a siam ngei a beisei thu a sawi a. Kum kalta chhung khan kan Police Department-ten Heroin gram 747, cheng nuai 84.80 man leh Meth kg 11.612, cheng nuai 150.96 man hu an man thu tarlangin, Excise & Narcotics Department-ten Heroin gram 539 leh Ganza gram 880 an man thu a tarlang bawk a. Ruihhlo do kawngah Kohhran, NGO leh tlawmtngai pawl hrang hrangte nasa lehzuala tan la turin a sawm bawk a ni.

Khuallian chuan thu a sawi zawhin ceremonial parade lawmman a sem a, Pu C. Lalchawimawia, IIHR Innovative Farmer Award 2025 dawngtu hnenah chawimawina a hlan nghal bawk a. Kumin Republic Day Ceremonial parade-ah hian SI C. Lalremruata chu Parade Commander a ni a, SI Lalmalsawma chu 2nd Parade Commander a ni a, Armed contingent 1, unarmed contingent 2 leh school contingent 12 an awm a ni.

1. 2nd IR Batallion Armed Contingent – Commander: SI H.Lalmalsawma (Armed)
2. Govt.Khawzawl College NCC-Commander: Laltlanhlua Senior Under officer (Un-Armed)
3. Khawzawl Higher Sec School :Commander-Sergeant. Lalhriatzuala (Un-Armed)

School Contingent:
1. Khawzawl Higher Sec School : Commander- Lalmuankima, Cl-XII
2. Khawzawl Senior Sec School: Commander- Thomas Malsawmzuala, CL-XI(Commerce)
3. Govt.Khawzawl High School: Commander- Peter Lalthangliana, CL-X
4. JNV Khawzawl: Commander- Zonunmawia, CL-XI
5. PES Khawzawl Vengthar Girls Contingent: Commander- B.Lalbiaksangi, CL-IX
6. PES Khawzawl Vengthar Boys Contingent: Commander-Lalchhuanawma, CL-Xi (Arts)
7. Far East Experimental High School: Commander- David Malsawmdawngzela, CL-IX
8. Govt.Little Flower School Contingent -1: Commander- Lalhruaitluanga Ralte. CL-VIII
9. Govt.Little Flower School Contingent -2: Commander- C.Lalduhsanga. CL-VII
10. PES Khawzawl BOYS Contingent: commander-Malsawmkima Fanai-CL-IX
11. PES Khawzawl Girls Contingent: Commander – Lalpianpuii Renthlei, CL-IX
12. Govt.Khawzawl High School PIPE Band: Commander- Zonunthari, CL-X

Republic Day 2025 ceremonial parade-a ti ṭha lawmman dawngtute chu:

Pakhatna – JNV Khawzawl
Pahnihna - PES Khawzawl Vengthar Girls Contingent
Pathumna - Khawzawl Higher Sec School

Mualvawm Field-a hun hman zawh veleh DC Bangla tualah sawm bikte tan ‘VIP's At Home’ programme buatsaih niin, ruai kil ho a ni.