4155/2025-2026

Dated Kolasib, the 26th January 2026: Tukin zing dar 8: 30 AM khan Kolasib Sports Stadium ah India Republic Day vawi 77 -na ropui taka lawm a ni a. Pu Robert C Lalhmangaiha, Deputy Commissioner, Kolasib chuan khuallian niin a hmanpui.

Khuallian Pu Robert C Lalhmangaiha chuan India hnam puanzar pawt pharhin Parade Contingent-12 in hnam puanzar zahna chibai an hlan a chhanglet a, Republic Day thuchah a sawi chhunzawm nghal a ni.

Kolasib District Bawrhsap chuan India Republic Day vawi 77-na lawm tura lo kalkhawm, Parade contingent hrang hrang , zirlai naupangte leh mipuite chu chibai bukin, he ni hi India ramin Danpui a neih ni leh Republic a nihna nemnghettu a nih avanga ni pawimawh tak a nih thu a sawi a. Kolasib District chu Mizoram luhka a nih avanga District pawimawh tak a nih thu tarlangin, sawrkar department hrang hrangte thawhhona tha tak chu chhuanawm a tih thu leh hmasawnna hna kalpui zel nan a aia nasaa tan la ho zel turin a chah bawk a ni.

Sawrkar hnathawkte chu an hna chu eizawnna mai ni lova mipui rawngbawlna (Public Service) a nihzia hria a, mipui hamthatna ngai pawimawh turin a fuih a. Hmasawnna tluantling neih nan sawrkar hmalakna chauh a tawk lova, khawtlang hruaitute leh tlawmngai pawlte thlawpna a pawimawhzia a sawi bawk. Sawrkar leh mipuite inkarah inrintawnna leh thawhhona tha a awm phawt chuan District-in hma a sawn lehzual dawn a ni, a ti. District thenawm , Cachar leh Hailakandi te nen pawh inlaichinna a that thu sawiin, Chapchar kut lo thleng turah pawh an District aiawhte sawm an tum a ni, a ti.

Vawiin Kolasiba Republic Day Day vawi 77- na lawmnaah hian Parade Contingent 12- Armed Contingent -1, Unarmed Contingent- 3, School Contingent -8 leh Pipep Band- 1 awm in, Parade Commander hi SI C Vanlalhruaia a ni a, SI . K Lalzarmawia chu second Commander a ni thung.

Bawrhsap hian Parade Contingent tithate hnenah lawmman semna a nei nghal a, Parade Contingent - te lawmman lak dan chu hetiang hi a ni:-

Unarmed Contingent

Pakhat na - St John Higher Secondary school NCC Army wing
Pahnih na - Govt Diakkawn HS, NCC Airforce Wing
Pathum na- St John Higher Secondary school NCC Airforce Wing

School Contingent
Pakhat na -Govt. CZS Higher Secondary School
Pahnih na - DIET Kolasib
Pathum na -JNV Thingdawl

Republic  Day Vawi- 77 na puala Khuallian  thusawi kimchang hi a hnuaia link-ah hian chhiar theih a ni e.

https://dipr.mizoram.gov.in/post/republic-day-2026-kolasib-bawrhsap-pu-robert-c-lalhmangaiha-thusawi