Vawiin khan Aijal Club-ah  Reserve Bank of India(RBI) chuan sum enkawl leh hman thiam chunga inzirtirna hapta hawnna hun a buatsaih a. He hun hi Finance Principal Secretary Pu Lalnunmawia Chuaugo chuan khuallian niin a hmanpui a; Financial Literacy Week hian  June ni 8 thleng a awh anga, hemi chhung hian bank hnathawk te chuan sum enkawl chungchangah mipui zirtirin an feh chhuak  dawn a ni.

RBI Financial Literacy Week hawngtu, Finance Principal Secretary Pu Lalnunmawia Chuaungo chuan India ram hmundang ngaihtuah in sum kaihnawihah Mizoram mipuite kan vengva tawk lo a tan kan lak nasat a ngai a. Mipuite hnenah sum enkawl dan tha zawk zirtirna nasa zawka pekchhuah a nih theih nan bank hnathawkte leh chanchinbumi ten mawhphurhna sang tak an nei a ni a ti. Aizawl khawpui leh district khawpuite an ziaawm deuh tih lohah chuan bank leh bank facilities te thingtlangmite tan hman theih a tam lo hle a; bank lam pawhin tan an lak nasat a ngai tih a sawi a. "Sawrkar laipuiin milian leh mite zawng zawngte huapzo hamthatna scheme tam tak a siam te hi Mizoram mipui tam zawkin in an chhawr lo a, achhan chu an hriat ve loh vang a ni in a lang a. Sum hman leh sum enkawl chungchangah mipuite zirtir an nih chuan heng scheme tha tak tak te hi hman nachang, dil na chang leh chhawr tangkai dan kan hre thei dawn a ni. Tunah chuan, a bikin Mizoramah, chhungkua a eizawngtu ber an thihin an chhungkaw dinhmun chu ngaihtuah ngamloh khawpin a chau thin tih kan hre vek a. Sawrkar laipui hnuaia hamthatna scheme leh programme-ah te lo inziaklut thin se chuan cheng nui 3, nuai 4 vanduaina avanga intuamhlawmna an dawn theih te pawh a awm a ni", a ti.

Pu Lalnunmawia chuan mimal, sumdawng leh sawrkar ang te thleng pawhin indawr tawn nan sumfai chelek a ni deuh ber zel chu a himloh thu a sawi a; a theih anga Credit card hman emaw Debit card hman theihna system neih a tul hle a, sumdawng te pawhinpawisa fai aia card hmantheihna khawl an uar a tul a, chutiang atana mipuite puahchah turin nasa zawka financial literacy kalpui a ngai  tih a sawi a. Sawrkarin sumfai hmanga  Financial transaction a siam thin chuan corruption a ti punlun a, sumfai telloa indawrna(cashless transaction) kalpui a nih chuan sum hmandan felfailo leh eirukna a ti zia dawn a ni a ti.

RBI in Financial Literacy(FL) Week an huaihawt chungchang sawifiahtu, Pi Mary L Deng, General Manager & Officer - in- Charge, RBI Aizawl chuan  sum enkawl dan hriatchianna chu thil pawimawh tak, sum hman dan leh khawl dan hlawk zawk  min hmuhfiahtirtu leh sum kaihhnawih thila thutlukna dik min siamtirtu  a ni a ti. RBI in India ram mipuite chu financial literate an nih theih nan nasa takin tan a la mek a, kum 2016 hnuah phei chuan mipui zinga zirtirtur bik chi 5 - loneimite leh kuthnathawktute, Entrepreneurs, Sikul Naupang, khua leh tui kum upa lam te leh Self Help Group te a thlang chhuak a. Heng mite zirtir tur hian trainer leh bank hnathawkte a thlang anga, zirtirna hi Mizo tawng ngeia pek a nih theih nan RBI in ruahmanna a siam mek a ni a ti. Mizoramah Financial literacy beihpui thlak turin  Financial  Literacy Centre(SBI)  8, State Bank of India in a enkawl mek a, Mizoram Co - operative Apex Bank in FLC  9 a kalpui mek a. Bank te hmalakna bakah, RBI chuan kumin June thla thleng khan Mizoram hmun hrang hrangah  -  Zirna Inah te leh Bank awmlohna thingtlang khuaah te Financial Literacy Camp buatsaihin Zirna In 12 leh thingtlang khua 6 an tuam tawh a; nakumah Zirna In 16 leh  thingtlang khua 8-ah FLC an huaihawt leh dawn a ti. Pi Mary chuan Mizoram sawrkar pawhin financial literacy pawimawhna a hriatchian thu leh MBSE pawhin zirlaibu a telh tur Financial Skill Topics a thlangchhuak tawh tih a tarlang bawk a ni.

RBI Financial Literacy Week hawnnaah hian Aizawl Bawrhsap Dr.A.Muthamma leh  NABARD GM Pu RK Srivastava te pawhin thusawina hun an hmang a. Aizawl Bawrhsap chuan District Administration a enkawl chhung reilotea a hmuhchhuah chu social security scheme hrang hrangah te hamthatna dawngtu mipui lam ten hriatloh avanga dil nachang an hriatloh a tam hle a, Bank leh sawrkar hnathawkte pawh an tan a ngai niin a sawi a. Hamthatna dil theih mipuiin nachang an hriatloh avanga an dil loh tam tak a awm tih sawifiahin  India  ram hmundanga hriat hlawh tak, Education Loan phei chu dil tuma a mah va pan ta pawh an la awm lo a ni a ti.

RBI Financial Literacy Week hawnnaah hian Press mite nen inkawmna, zawhna leh chhanna hun hman a ni a, MJA chuan kimchang zawka mipui hnena puanchhuah tur leh mipui hriatturte khawrchhuah a nih theih nan RBI leh Bank official te chu Press Conference buatsaih sak turin an sawm  ani. RBI Week chhung hian " Consumer Protection" tih thupui a hmangin Consumer te tana hriattur pawimawh  zirtirna chi 4 - Know your liability for unauthorized electronic  banking transaction, Banking Ombudsman, Good practices for a safe digital banking experience leh Risk vs return hmangin kawng hrang hrangin zirtirna pekchhuah a ni dawn a ni.