Pu Lal Thanzara chuan ei leh in ah damdawi pawlh te, taksa tana himlo leh thianghlimlo a pun tak zel avangin mipui him nan sawrkar chuan Health & Family Welfare Department hnuaia Food and Drugs ngai pawimawhin NEDP kaltlangin a ti changtlung zel a ni, a ti. Pu Lal Thanzara chuan taksa hrisel nan ei leh ina fimkhur a pawimawhzia Mizo mipui ten kan hriat a pawimawh a, hemi kawnga zirtir thei ten zau zawka zirtirna an kalpui a tul thu a sawi a. Sawrkar chuan mipuiten ei leh in thianghlim leh hrisel kan ei theihna turin quality control a pawimawhzia hriain hemi kawnga sawrkar hmanraw pawimawh Food and Drugs thuam that nan 2016-2017 sawrkar kum atanga 2018-2019 thleng hian cheng vaibelchhe 3.25 ruahman a nih thu leh heng atang hian hmasawnna hna engemawzat thawh a nih tawh thu Health Minister hian a sawi a ni.

Food Safety and Standards Authority of India (FSSAI) chuan ram pum huapa hman tur system tha leh changtlung FoSCoRIS a siam chhuak a. Ei leh ina sumdawngten ei leh in thianghlim siam tur leh an chet thianghlimna tura dan an zawm leh zawm loh endikna tur hmanraw tangkai tak a ni dawn a, a endiktu lam pawhin rang tak leh chat lak lovin endik hna hi an thawh theih phah dawn a ni. Tun dinhmunah Food Safety Officer-ten duty-a an chhuahin an thil hmuh te file hmangin an submit a ngai  thin a, form ziah tur tam tak a awm bawk a. FoSCoRIS hman a nih hnuah erawh chuan awlsam takin hmun leh hmun atangin report an thehlut thei dawn a. A hrana file hmanga thehluh ngai lovin Designated Officer, Commissioner leh FSSAI Central Server thlengin an report hi a thleng nghal thei dawn a ni. 

NEDP kaltlang hian Food and Drugs tihchangtlung nan laptop - 15; projector -10; printer -20; tablets -18; refrigator -10; steel almirah -20 leh executive table -3 an lei a. Health Minister hian vawiin vek khan a sem nghal a ni.