Vawiin khan Kolasib District chhung Aizawl - Silchar tlangdunga awm Serkhanah Reserved Bank of India chuan sumpui fehchhuah beihpui outreach camp an buatsaih a. He hunah hian RBI hnuaia bank hrang hrangten mipui mimir tena bank an chhawr theih dan turte inzirtir a ni a. Hei hi Mizorama a tum 3 na a ni.
Outreach Camp ah hian Pu R. Gandhi, Exevutive Director, RBI Guwahati chuan thusawiin bank in a tum bulpui ber chu mipui nawlpuiin bank puihna an dawn a, a zar zo theih ang angte zo tir a ni, a ti a. Mizoram chu literacy percentage a san tlat avangin bank in mipui a dawmkan kawngah India ram hmundang aia a tangkai a beisei thu sawiin India rampum a cheng 57% chauh hian banking facility hi an dawng pha rih a ni, a ti. Kolasib District chhung hmun hrang hranga huan leh thlai chin leh ranvulh dan te a mita a hmuh chu bank puihna a liantham zawka tih theih a nih a rin thu a sawi a. District thuneihnain an tana ruahmanna a siamte pawh bank nena kal rem taka tih chhoh a duh thu pawh a sawi a ni. Ram mipuiten bank kaltlanga hamthatna kan neih hi kan chanvo liau liau anih avangin RBI hnuaia bank te chuan mipuite tan theih tawp kan chhuah zel ang, Pu R. Gandhi chuan a ti a ni.
Pi Surekha Marandi, Regional Director, RBI chuan Mizoram leh hmarchhak state ah te bank lem an tam thin avangin bank rintlak leh dik mipui ten kan thliar thiam a ngai a, kan sum neihte ho taka kan chan mai loh nan sum chungchanga hriatzauna (financial literacy) pawh kan neih a ngai a, bank hmanga kan sum dinhmun leh eizawnna tih ngelnghet kan tum tur a ni, tiin India rama mi hausa ber ber Mukesh Ambani te ang pawhin bank belin an dinhmun an siam a ni, a ti.
Outreach Camp ah hian SBI kaltlanga Kishan Credit Card loan lakna lehkha sanctioning letter mi 21 district chhungkaw hrang hrang mite hnenah semchhuah a ni a. Rural bank kaltlangin mi 21 thlanchhuahte hnenah loan lehkha semchhuah a ni bawk a ni.
Serkhan leh a chhehvel mipui pungkhawm ten zawhna thahnem tak an zawh pawh bank hotuten an chhang bawk.
Camp ah hian Exis Bank, U Bank of India, Punjab National Bank, NEDFI, ICICI, MRB, SIDBI, Mizoram Co-operative Apex Bank, Central Bank of India, Bank of Baroda, SBI, RBI leh NABARD ten stall siamin mipui a duh apiangte tan an in hawng bawk a, bank kaltlanga din self help group ten an thil dehchhuahte an pho bawk a ni.
