He thu hi Revenue Minister Pu R.Romawia'n ama bialchhunga Chaltlang North Khawtlang hruaitute, Chaltlang Lilly venga a kawmna ah  sawrkarin Revenue danthar a siam mek hman anih tur chungchang a sawina ah a tarlang a.

Mi thenkhat ram ngah em em leh hmang tangkai lem lo an awm teuh laiin eizawnna tura huan siamna fahran chu sawiloh insakna tura ram zimte pawh nei zolo Mizoram ah kan awm teuh tawh a hei hi thil diklo lian tak a ni Minister chuan a ti a. Sawrkar chuan inhmun pass pek tur te a ruahman mek a. Heng inhmun te hi mimal leh a chenpui chhungkaw member dangte inhmun la nei miahlo te hnenah chauh pek a ni ang a ti. Ram leh inhmun feltawk lovangin mithenkhat ten sawrkar an khinga, Revenue department pawn leiman tam tak a chawi tawh a. Department lam te pawh kan inenfiah anga, Revenue danthar duan mek te pawh hi anih dan ang anga khauh taka kalpui a ngai dawn a ni a ti a. Ram inchuh thubuai chu tun dinhmuna Ukilte thubuai hlawkber anih tawh thu sawiin, hetianga kan ram kal zel chuan thisen hial te pawh kan la inchhuah sak ang tih a hlauhawm tawh a ni a ti. Mizoram 21,081 sqkm a zau hi a lenbelh hmelsi lova, Mizo mipui tamtaka la pung zel tur hian Pathian min pek, ram zimte hi duhamna tellova rualkhai zawka insem kan zir a ngai a ni a ti.

Chaltlang North khawtlang hruaitute leh Minister inkawmna hi an Local Council hotuten an kaihruai a. He hunah hian an vengchhung mamawh hrang hrang te Min ister, an bialtu MLA nibawk hnenah hian an lo thlen a ni.