Vawiin chawhnu khan ‘Consultative Committee of Revenue Department’ chu Land Revenue & Settlement Directorate Conference Hall-ah Land Revenue and Settlement Minister Pu J. H. Rothuama hovin an thukhawm. He meeting-ah hian Consultative Committee Member, Pu R. Selthuama MLA; Principal Secretary LR&S Pu R. L. Rinawma; Law Secretary Pu Singthanga te bakah Revenue Department-a senior officer te pawh an tel a ni.

Consultative Committee ah hian ‘The Draft Mizoram Revenue Bill, 2012’ duan chu uluk tak leh zau takin an thlir ho a, siamthat ngai awma an hriat pawh an sawiho bawk. Hemi chungchunga 2008-a Draft Bill 2008 siam zirchiang tur leh a huam zau zawk, famkim zawk leh siamthat ngai lai te siamtha tura din ‘Expert Group – Study Team’ chu he dan chungchangah vawi 18 lai an thukhawm hnuin Draft Bill hi peih fel thawhkhat a lo ni a. Hemi hnu hian a duh apiang tana rawtna leh sawiselna thehluh hun pawh hawn a lo ni tawh bawk a. Rawtna lo lut te chu Study Team hian uluk takin a thlir hnu in Draft Bill hi Consultative Committee-a sawiho tura pharh a lo ni ta a ni. Study Team-ah hian Revenue Minister chu Chairman niin, Vice-Chairman, Member Secretary te bakah Member dang paruk an awm a ni.