Vawiin khan Land Revenue & Settlement Minister Pu Lalruatkima hovin LR&S Conference Hall-ah Revenue Department Officer te an thukhawm a, Department hmalakna hrang hrang thlir anih bakah Department tihchangtlun dan tur kawng hrang hrang an sawiho.

Revenue Minister Pu Lalruatkima chuan Revenue Officer te chu an hnuaia thawktuten an harsatna leh pawimawh an neih te an thlenna ngamna nih tum tura fuihin Department Officer te an felna leh an taimakna avangin thlamuanthlak a tih thu a sawi a, Revenue Act kan neih te ennawn a siamthat ngai lai te bawhzui mek anih thu sawiin ram enkawlna chungchanga kanphung kan lo neih ah te Sawrkarin dan a siam te zah thiama ngaipawimawh turin a chah a. Land Acquisition Act pawh mizo hnam zia leh nihphung mila dan siam anih thu leh a hlawhtlinna tura hma lak mek anih thu a sawi.

Minister chuan department hmalakna lehn kalphungah hmasawn belhna tur tam tak a awm a ni a ti a, mi ten revenue Department leh a thawktute an hmuh dan leh hriat dan te chu a thlamuanpuiawm zawng leh rin tlak an nihzia tilang theitu anih zel theih nan tan la thar sauh sauh turin a fuih a, sawrkar hnathawkte tan sawrkar thuruk vawn theih a pawimawhzia sawiin dan ang taka engkim kalpui thin hi a him ber a ni a ti a. LSC inbawhthuah leh ramri chungchangah te buaina tam tak a awm thin a, heng harsatna te hi pumpelh anih theih nan fimkhur taka thawk turin leh an hnuaia thawkte pawh ukul taka vil thin turin a chah a ni. Minister chuan Revenue department lakah sawrkar beiseina a sang a, chhiah lak leh khawn chungchangah te pawh diktak leh felfai taka thawk turin Department Officer te a chah a ni.

Pu C. Lalpeksanga, Addl. Secretary, LR&S pawhin Land Holding System a fuh loh avangin land record siam pawh a harsa in a buaithlak em em a, hei vang hian Modern Land Recording System kalpui turin ruahmanna siam mek a ni a  ti a, hei him tihhlawhtlin anih hunah tuna harsatna an tawh te hi sutkian anih theih a beisei thu a sawi a, tunlai khawvel mila Department kalpui tum tu leh a ngaihna hria Minister an nei chu lawmawm a tih thu leh thlamuanthlak a tih thu a sawi a ni.

Vawiin thutkhawmah hian Revenue department dawr tut e tan a thil a awlsam zawk dan tur kawng hrang hrang an sawiho a, chhiah pek dan pawh ‘e-payment’ system a kalpui anih mai bakah single window system a chhiah pek anih theih dan tur te sawiho niin ruahmanna siam tum a ni a, digitization of land records leh documents te, land pass pekchhuah dan mumal leh awmze nei zawka kalpui dan tur te bakah Department chhunga staff indaihlohna leh harsatna hrang hrang awm te sutkian dan tur an ngaihtuah a ni.

Minister hova Revenue Department Officer te thutkhawmah hian Revenue Secretariat leh Directorate a Gazetted officer zawng zawng bakah District hrang hrang atangin Settlement Officer leh Assistant Settlement Officer te an tel a ni.