Vawiin chawhma khan Land Resource,  Soil & Water Conservation(LRS&WC) Department Office-ah Mizorama Thelret Chingtute intelkhawmna pawl, Mizoram Rubber Planters Association(MIRPA) chuan an pawl din champha vawi khatna pualin programme an nei a. He hun hi Deputy Speaker Er Lalrinawma chuan khuallian niin a hmanpui a ni.

Deputy Speaker Er Lalrinawma chuan ram changkang zawk te pawn chin an chak, an ram sik leh sa in a zir loh avanga an chin theihloh Thelret chin chu Mizo chhungkaw tam tak ten eizawnna atan an hmang tan der tih han hriat chu thil lawmawm tak a ni a ti a. Khawvel hmasawnna thang mekah lirthei leh thil dang dangah Thelret  mamawh lohna a awm mang lova. Chuvangin Thelret chu sumchang thlai chinsual awm thei lo tluk a ni tih a sawi a. Mizoram Sawrkar pawhin  Thelret chin hlawk zia hriain  Thelret tharchhuah tam kawngah nasa zawka tan lak tumin Socio-Economic Development Policy(SEDP) hnuaia Rubber Board a din tawh tih a sawi a. "Sumchang thlai zingah pawh Mizoram chhunga hmun pilril zawkah te chin theih, a phurkual leh a hralhna chungchanga harsatna awm tlem tak a ni a. A chi tha chi tlang ulukin a chinna tur hmunruak kan la ngah bawk nen kan chin tam phawt chuan kan ram intodelhna atana hmalakna pawimawh tak a ni dawn a ni", a ti.

MIRPA Raising Day inkhawm hi an pawl President Pu Vanlawma Chhangte chuan a kaihruaia. Sawrkar anga hmalakna   Pu C. Hualthanga, Jt Director, LRS&WC in a sawi a. Rubber Planter te infuihna leh hriattur pawimawh inkawhhmuhna hun Er CL Thangliana hnen atang ngaihthlak a ni. Report a tarlan dan chuan Mizoramah Thelret  ching chhungkaw 1300 chuang an awm mek a. Heng zinga chhungkaw 300 chuang chuan kumin khan an Thelret te an hnai tan tawh a ni. A tlangpui thuin Thelret  kung hi kum 7 a tlin chuan a hnai theih tawh niin mithiamte chuan an sawi a. Mizoram chhunga Thelret hnai tawh te atanga chhut dan chuan Thelret kung 15 atangin thlakhat chhungin Rubber Sheet Kg 1 bawr a hnai theih nia chhut a ni. Rubber Sheet hralhna man zat  hi International Market a zira danglam thin a ni a; tunah hian Kg 1 hi Rs 130 in a hralh theih mek a. Mizorama Rubber huan neite hi a dan tlangpuiin a nei tlem deuh Kung 500 bawr  atanga a nei tam deuh  Kung 10,000 dawn nei te an ni hlawm a ni. Thelret chingtute tanpuina kawngkhat atan Mizoram sawrkar chuan Rubber Khawl 100 lei turin hma a la mek a; Thelret chingtute mamawh hmanraw hrang hrang awlsam taka leichhawn tur Cheng Nuai za man hu a chah thleng dawn bawk ani.