1519/2022-2023
Aizawl, the 9th August 2022: Tukin zingkarah khan Revenue Minister Pu Lalruatkima chuan concerned official te hruaiin Ainawn venga sawrkar quarter hlui tawh deuh leh chenna tlak tawh lo ni a report te chu a endik a. Vengchhung Local Council hotute leh Quarters' Allottee Welfare hruaitute nen Type - I, Type -III leh Type -IV te an enho a. Type - I zinga engemaw zah chu hmanhmawh deuh a siam ngaiin an hria a ni.

Revenue Minister Pu Lalruatkima chuan Ainawn Venga Quarters's Allottee ten Chief Minister nimin lamah an hmu a. An harsatnate hi a rang lama ngaihven chi nia a lo hriat sak avangin hmanhmawh takin tukin lamah a rawn endik tir a. Tukina endikna report te pawh hi Chief Minister hnenah thlen leh a ni ang a ti.

Ainawn vengah sawrkar quarter tam tak a awm a. Chutiang bawkin mimal chenna in enge maw zah a ding tawh bawk a. Hemi chungchang hi sawrkar chuan ngun takin a ngaihtuah mek a. LR&S( Revenue Department) lamin ramri kham dan tur vel a teh hnuah GAD hnenah report a thehlut zel a. GAD hian helai hmunhma chungchanga sawrkar kal zel dan tur ruahmanna a siam dawn tih a sawi a. Tun dinhmunah hna thawh tur zinga tam zawh chu zawh a ni tawh a ni a ti. Revenue Minister chuan Ainawn Veng mipui leh Local Council te chu an veng chhung hmasawn zel dan kalpui tura sawrkarin hma a lak mek avangin sawrkar official te hnathawh ti khaihlak lo tur te , sawrkar quarter te nek chep zawng hna thawk lo tur leh veng dang atanga insak rawn tum te lo khap rih turin a chah bawk a ni.

Tun dinhmunah Ainawn vengah hian Sawrkar Quarter 184 a awm mek a. Heng zingah Type -I - 88, Type - II - 56, Type -III - 24 leh Type -IV - 16 a awm a ni. Phalna nei a quarter luah chhungkua 125 leh phalna nei loa quarter luah chhungkua 43 an awm a. Quarter structure a him tawk loh avanga allotment siam phal tawh loh quarters 10 leh a chhiat deuh tawh avanga allottee ten an quarter luahlai nena an luahkawp quarter 7 te a awm bawk a ni. Tukina Revenue Minister hova an endiknaah hian type - I quarter thenkhat chu a him tawk lo hle tih hmuh a ni.

Revenue Minister hi Aizawl West -I bialtu MLA Pu Zothantluanga'n a tawiawm a. Official lam atangin Aizawl District Bawrhsap Dr Lalhriatzuali Ralte, Chairperson of Aizawl DDMA nibawk, Pu K.Laldingliana, Director, LR&S, Pi Angela Zothanpuii, JS, LR&S, Pu K.Lalrohlua, JS, GAD, PWD official te, DM&R official te an pawh he hunah hian an tel a ni.