Vawiin chawhma khan Kuthnathawktute Ni, 2017 chu Mizoram hmun hrang hrang 40 te rualin Saitual ah pawh Chhimveng Presbyterian Kohhran Hall-ah Revenue Minister Pu R.Romawia hova hman a ni.

Revenue Minister Pu R. Romawia chuan kuthnathawka eizawngtute chuan hmathlir thui tak nei chunga ronghet siam kawnga hmalak an tum a pawimawh thu a sawi a. Rilru put hmang thlakin hlawk zawka thlai thar te pawh hralh a nih theih nan kharchhawngtute leh dawrpuia lo zuar chhawngtute thawhpui thiam hi lo/huan thlai thartuten an tum a ngai a ti.

Rambuai avanga tawrhna in Mizo khawtlang nunah thiltha- taihmakna, intodelh duhna, rinawmna leh a dangte tichhe vekin rinawmlohna, thatchhiatna leh hlemhletna ten a thlak hlauh tih a sawi a. Pu R.Romawia chuan rambuai vanga Mizo ten kan natna vei chu tihdam a nih loh chuan hmasawnna a awmloh tur thu sawiin khawvel ram hmasawn leh hausa te chu hnam taima leh rinawm chen khawmna vek a ni a ti. Kuthnathawktute hmakhua ngaia NLUP lungawithlak taka kalpui a nih thu sawiin NLUP chu chhumchhia ten leirem an rahna tura siam a ni a ti a. NLUP hlawhtlinpuitu tam tak te chu tanpuina dawngtute zinga mi rilru puitling zawk te an ni a, hlawhtling tur chuan rilru puitlinna a pawimawh hmasa a ni a ti.

NLUP atanga NEDP kaisanna chu eikhawp atanga eisenloh tharchhuah tumna policy leh programme a ni tih tarlangin Mizo ten khawtlang, tawng, lehkhathiam, pianphung leh ram leilung ah remchan bikna leh vanneih bikna kan neih avangin a hlawhtlin ngei mithiam ten an rin thu a tarlang bawk.

Kuthnathawktute Ni 2017, Saitual Programme hi Pu Donny Lalruatsanga, SDO(C), Saitual in a kaihruai a. He ni bik, kuthnathawktute puala buatsaih ah hian NLUP hlawhtlinpuitute, AMFU, Line Department official te leh Saitual Town Joint VC te hnen atangin thusawi ngaihthlak a ni.