2184/2026-2027

Aizawl the 11th September, 2026: Land Resources, Soil & Water Conservation Department Minister Pu Lalthansanga hovin vawiin khan Departmental Quarterly Review Meeting chu Conference Hall, Directorate of LRS&WC ah neih a ni a. Secretariat leh District Officers bakah Directorate hnuaia Officers leh staff te an tel a ni.

Meeting hi Pu R Lalbiakzuala, Secretary in kaihruaiin he hunah hian District Officers 8 te kim takin an inlan a. Anmahni bial theuha hmalakna - a bikin Chief Minister Rubber Mission chungchanga an thlen chin leh harsatna tawh te ngaihthlak sak a ni. Presentation hmanga sawifiah niin Dept hnathawh te hlawhtling leh chhenfakawm taka chhawr a nih theihnan Minister hoin a hmunah sawiho nghal vek a ni.

Minister Pu Lalthansanga chuan thusawiin LRS&WC Dept chuan Zoram dung leh vang a fang tan a, tun dinhmunah chuan he Dept hi Zoram tan innghahna tlak, rintlak takah miin an ngaih tawh thu a sawi a.

Chief Minister Rubber Mission hi kan kuthnathawk tute tana a pawimawh zia, hlawhtling lo thiang loa a ngaih avangin he Review Meeting hi ko a nih thu a sawi.

Rubber hi a bultanna chauh niin kuhva, coffee leh hmunphiah chingtute tan hmachhawp siam zel a ni a. Watershed management pawh hi LRS&WC Dept hna liau liaua a ngaih thu te, a khawihtu diktak tur chu he Dept a nihzia hi Media, mipui leh sawrkar hotute bulah sawi nasat a tul thu a sawi bawk.

Climate Change a ngai pawimawh hle a. Dept in Carbon Trading a hmalak dan tur te, he Rubber Mission nen hian a inmil hle zia te a sawi a. Rubber Mission kalpui nasat a rem lohna hmun khawchhak lam Khawzawl ah te pawh Coffee chin dan turah hmalak zel a ni a ti bawk.

District Officer te chu mahni bial theuhah thahnemngai turin leh ram tana thil thar hnutchhiah thei theuh tura hnathawk turin a fuih bawk a. He hun hi Field Officers mai bakah Directorate leh Secretariat Officers te chuan hlawkthlak an ti hle a ni.