2183/2026-2027

Kolasib, 11th September, 2026: Vawiin khan 13th Mizoram State Anti-Tobacco Day chu Kolasib District Hospital OPD-ah leh Kolasib khaw chhung zirna in hrang hrang hmun 19 ah hman a ni.

District Hospital OPD-a inkhawm tawi buatsaih hi Kolasib Senior Chief Medical Officer, Dr. R.K. Lalthlamuana chuan a kaihruai a. He hunah hian vaihlo zuk leh hmuamin nasa taka kan hriselna a khawih pawi zia leh, midang meizuk khu hip luhin hriselna a tihchhiat theih ziate a sawi a. Mizoramah hmeichhe chuap cancer an tam chhan bulpui ber chu vaihlo a nih zia a sawi lang bawk.

Dr. Christine Chhuanmawii, District Consultant, District Tobacco Control Cell chuan kumin Mizoram State Anti-Tobacco Day thupui, "Towards Tobacco Free Home" chungchang sawi zauvin, vaihlo zuk leh hmuam laka kan fihlim loh avanga tul lo taka sum leh pai kan hmanral nasat thu a sawi a. Kan inchhungkhurah ngei meizuk khap a pawimawh zia tarlangin, kan hrisel lohna chhan tam tak hi vaihlo kaihhnawih a nih thu a sawi a ni.

Hemi ni pual hian Kolasib khaw chhung zirna in hmun hrang hrangah zirtirtute kaihhruainain zirlaite hnenah vaihlo zuk leh hmuam that loh zia inzirtirna neih a ni a, zirlaite hi vaihlo ti lo turin intiamkamna neih tir an ni bawk.