2182/2026-2027

Aizawl the 11th September, 2026: Health Minister Pi Lalrinpuii hoin vawiin khan Directorate of Health & Medical Education Auditorium, Aizawlah State Anti-Tobacco Day vawi 13-na neih a ni.

Khuallian Pi Lalrinpuii chuan mihring cheng zat atanga chhutin Mizoram chu India rama Cancer vei tamna ber a ni mek a; vaihlo zuk leh hmuam hi cancer siamtu a nih avangin Mizorama chhungkua zawng zawngte, vaihlo leh a kaihhnawih tel lohna chhungkua din theuh tum turin a ngen. Tun hma atang tawhin uar tak leh nasa takin zuk leh hmuam do hna kalpui thin a ni a, tunah pawh tha thlah loin, a aia uar lehzuala tan lak thar a ngai a ni, Health Minister chuan a ti a. Zuk leh hmuam dona kawngah chak zawka ke an pen theih nan mipui chhiah tlingkhawm - Cess atangin hma thar lak tumin ruahmanna an siam mek, tih a sawi bawk.

Kum 2013 atang khan Mizoram State Anti-Tobacco Day hi hman tan a ni a, Mizoram hi India rama State Anti-Tobacco Day hmang hmasa ber a ni. State Anti-Tobacco Day hi September ni 11-a hman thin tura ruahman a nih angin kum 2013 atangin kum tin hman thin a ni a, kumin hi a kum 13-na a ni.

Rampum huap inelna ToFEI - School Challenge: Towards a Tobacco Free Generation, 2025 Foundation Category-a lawmman pakhatna dawngtu PM Shri Govt. Kawrthah Primary School-1 leh Consolation Prize dawngtu Govt. Leitlangpui Higher Secondary School te chu vawiin programme-ah hian an Award dawn lawmpuina thilpek hlanna hun neih nghal a ni bawk.

National Health Mission (NHM) hnuaia National Tobacco Control Programme leh Indian Society on Tobacco and Health, Mizoram tangkawp buatsaih he programme hi NHM Mission Director Dr. R. Lalchhuanawma chuan a kaihhruai a. School Education Director Pi Angela Zothanpuii pawhin thusawina hun a hmang a ni. Anti-Tobacco Day hi District hrang hrangah an remchan dan anga ruahmanna siamin District Tobacco Control Cell kaihhruaiin hun an hmang theuh a ni.

Khawvel pum huapin Global Adult Tobacco Survey 2016 – 2017 (GATS) chu kum 15 chin chunglam zingah neih thin a ni a. He Survey atanga a lan danin India ramah vaihlo zuk leh hmuam hman kawngah Mizoram hi a hmang nasa ber 2-na a ni mek a, 58.7% zetin an hmang mek a ni. Zirlai naupang kum 13 atanga kum 15 inkar zinga zirchianna Global Youth Tobacco Survey – 4 (GYTS-4)  ah India ramah Mizoram chu a sang ber niin 58% zet in an hmang mek a ni. Tunah hian Global Adult Tobacco Survey hi neih mek niin Global Youth Tobacco Survey hi neih leh tum mek a ni bawk.