2181/2026-2027

Lawngtlai, 11th September 2026: Vawiin khan Lawngtlai Bawrhsap - in Corporate Social Responsibility (CSR) kaltanga IRCON International Ltd - ten Zochachhuaha 'Health Centre' an sak a hawng a, Pu Sanjay AK Tripathi, Project Head, Myanmar Branch- leh a thawhpui ten an lo dawngsawng a ni.

Pu Donny Lalruatsanga chuan kalkhawmte chibai bukin tangkai leh hlawk taka a mamawhtuten an chhawr theih nan a lawm taka 'Health Centre' a hawn thu a sawi a.Mipuite mamawhna hriaa IRCON International Ltd - ten Health Centre an sa chu lawmawm a tih thu sawiin, an kal zelna turah duhsakna a hlan a. Health Centre - chu Zochachhuah leh a chhehvel khuate bakah KMMTTP Kawngpui zawhtuten an chhawr tangkai dawn hle a ni,a ti. Sumdawnna khawihtu Company - ten khawtlanga mawhphurhna an neih an hlenchhuahna CSR chu Lawngtlai District- a company dangte pawhin uar zawka an kalpui a tul hle tiin, hemi chungchangah hian Company hrang hrang leh Bank - te inbiakna a neihpui tawh thu a sawi.

Bawhrsap chuan Zochachhuah chu Myanmar nen a insumdawntawnna hmunpui ber a la ni dawn a, tunah pawh motor lut leh chhuak a tam em em a, hei vang hian Health Centre - neih a pawimawh zual tak zet a ti. Health Centre - a thawk turte pawh a hma lama indah thuai a ngai dawn tiin, Department lam ten theihtawp an chhuah a beisei thu a sawi bawk.

Pu Sanjay AK Tripathi chuan Bawrhsap ngeiin a hawng thei chu lawmawm a tih thu a sawi a. CSR kaltlanga hmalakna tha zawk a awm zel a beisei thu sawiin Bawrhsap hnenah hian Health Centre - Chabi a hlan nghal a ni.

Health Centre - hawn tâk hi a vâng - 11meters leh a dung - 7.5 meters niin Labour Room- 1, Patient Registrarion Room- 1 leh Doctor Room - 1 a awm a, cheng Nuai sawmhnih panga (25 lakhs) senga sak a ni.

Bawrhsap hi Dr. Remlalnghaki Dy. CMO, Pu R. Vanalruata,  BDO Lawngtlai leh Pu Zonunchama Ralte DIPRO - ten an tawiawm a ni.