2180/2026-2027 

Dated Khawzawl, the 11th September, 2026 : Vawiin khan Mizoram State Anti-Tobacco Day pualin Khawzawl High School-ah hun buatsaih a ni a. Sub-Divisional Police Officer (SDPO) Pu Jeremia Vanlalhmachhuana chuan khuallian niin he hun hi a hmanpui.

Khuallian Pu Jeremia Vanlalhmachhuana chuan thu sawiin, Mizoram State Cancer Institute-a mithiamte zirchian danin Mizoramah kum 5 chhungin cancer natna avangin mi 6,745 an thih thu leh an thih chhan tam ber chu vaihhlo leh a kaihhnawih kan tih nasat vang a ni tih an hmuh chhuah thu a sawi a. Heng vaihlo leh a kaihhnawih thilte hi pawi khawih thei lo leh itawm angin lang mahse mihring taksaah natna tam tak thlenin, nun a tihchhiat theih bakah, chhungte leh khawtlang tan harsatna a siam thu a sawi a. Vaihlo leh a kaihhnawih thil tih hi drugs hman sual bultanna a nih thu sawiin, meizial leh thil tha lo dangte hnawl ngamna leh mahni inthunun theihna hi puitlinna dik tak a ni tih a sawi.

Khuallian chuan kan ram hi heng vaihlo leh a kaihhnawih awm lohna ram (Tobacco Free Mizoram) a siam tur chuan chhungkua, zirtirtute, zirlai naupangte, khawtlang leh Kohhran hruaitute leh sawrkar kan ṭanrual a pawimawh hle a ni, a ti a. Sawrkar laipui chuan Cigarettes and Other Tobacco Products Act (COTPA) dan a siam thu leh he dan hian puipunna hmun (public place) reng rengah meizial zuk a khap thu te, kum 18 hnuai lam hnenah vaihlo leh a kaihhnawih hralh khap a nih thu te a sawi a. Zirlai kalkhawmte chu an hma huna an nih tumte tihlawhtlinga, khawltang leh ram tana mi tangkai an nih ngei theih nan vaihlo leh a kaihhnawih laka fihlim tlat turin a fuih a ni.

Chief Medical Officer (CMO) Dr. Shahnaz M. Zothanzami pawhin inlawmna thu sawiin, Global Adult Tobacco Survey-1 (GATS) in a tarlan danin Mizoramah mihring awm zat za zela chhutin vaihlo leh a kaihhnawih titu mi 67.2% an awm a, India-ah a sang ber state kan nih thu a sawi a. GATS-2 ah chuan tlahniam hretin, a sang ber dawttu state kan ni a, vaihlo leh a kaihhnawih laka fihlim turin hmasawnna tur kan la ngah hle tih a sawi.

Pu Lalhumhima, Head Assistant, District Education Office (DEO) hnen atangin Anti-Tobacco Squad report ngaihthlak a ni a. Khawzawl District chhunga zirna in zawng zawngah Yellow marking siam a ni a, Cigarettes and Other Tobacco Products Act (COTPA) dan angin zirna in leh sawrkar office zawng zawngah tobacco leh a kaihhnawih laka kan fihlim theih nan Anti-Tobacco Squad-ten awareness an nei thin a ni.

Kumin State Anti-Tobacco Day theme hi ‘Towards Tobacco Free Home’ tih a ni a. He inkhawmah hian kalkhawmten vaihlo leh a kaihhnawih laka fihlim tlat turin intiamna an sawiho a. Pi F. Lalrokungi, Health Supervisor chuan lawmthu sawiin hun a khar.