Vawiin khan Chief Secretary Pu Lalmalsawma hovin ATI Conference Hall, New Secretariat Complex-ah Result Framework Document leh Mizoram Right to Public Services Act, 2015 zir ho a ni.
Pu Lalmalsawma chuan sawrkar a ni emaw, pawl a ni emaw, hna kan thawhna apiangah result tha neih tumin kan thawk tur a ni, a ti. Sawrkar chuan kalphung a nei a, dan leh dun, rules leh regulations-te hi sawrkar kutthlak a tlak rual theihna tur leh thlei bik neilova hna thawh hrut rualtu a ni, a ti a. Dan leh dunte, kalphungte hi pawimawh viau mah se a tawpkhawkah chuan kan hnathawh hian rah tha a chhuah em tih a pawimawh ber a, chumi rilru pu chuan sawrkar hnathawkten hna kan thawk tur a ni, Chief Secretary chuan a ti.
RFD Nodal Officer Pu Lalrohlua chuan powerpoint hmangin kalkhawmte hnenah RFD chungchang a hrilhfiah a. Department in sawrkar kum khat chhung atana tih tur kan bituk zinga pawimawhzual lakkhawmna leh kum tawpa kan hnathawh that leh thaloh endikna hmanrua a ni, a ti.
Kum 2014-15 chhunga RFD a titha department 10 thlanchhuah hnenah Chief Secretary Pu Lalmalsawma hian chawimawina certificate a hlan a. Chungte chu an tihthat dan indawtin - Mizoram Home Guards, Horticulture, Excise & Narcotics, Environment&Forests, Food Civil Supplies & Consumer Affairs, Planning, Prisons, Cooperation, Finance leh School Education te an ni.
Vawiin hian 1.12.2015 atanga hman tan “The Mizoram Right to Public Services Act, 2015” chungchang inhrilhfiahna hun hman nghal a ni a. He dan hian India khua leh tui te chu Sawrkar in public service a pek chhuah thin te dilna an thehluh atanga hunbi tiam chhung ngeia an dawn tawh na turin chanvo (right) a pe a. Mizoram Sawrkar hnuaia Department hrang hrang pasarih – Food, Civil Supplies & Consumer Affairs Department, Transport Department, Taxation Department, Rural Development Department, Finance Department, Social Welfare Department leh Public Health Engineering Department te’n mipuite hnena public service an pek chhuah thin sawmnga leh pakhat (51) a huam a ni.
Vawiin programme hi DP&AR Secretary Pu V.Lalremthanga’n akaihruai a, Mizoram Department hrang hrang a Secretary, Director leh Officer liante an tel a ni.
