Nikum 7th February 2008-a India sorkar laipui hnuaia Ministry of Micro, Small & Medium Entreprises-in a tlangzarh ‘Rajiv Gandhi Udyami Mitra Yojana (RGUMY)’ chu vawiin khan Mizoramah pawh bultan thei turin Mizoram Entrepreneurship Network(MEN) huaihawtin I&PR Auditorium-ah a hawnna inkhawm ‘Special Programme on Launching of RGMUY in MIzoram’ neih a ni a. Vawiina Mizoram atana RGUMY hawnna inkhawm neihah hian Industries Minister Pu S.Hiato chu Khuallian niin Industries Commissioner Pu R.L.Rinawma, IRS chu Khual Zahawm a ni bawk.

 

 

Khuallian Industries Minister Pu S.Hiato chuan thusawiin Mizoramah industry kum engemawzat a ding tawh a, nachang hriat loh tam tak avangin a lian thei tak tak ngai lova, amaherawhchu sorkar laipui hmalakna thar RGUMY chuan Mizo thalai lehkhathiam hna nei lote tan pawh eizawnna kawng thar duhawm tak tak a rawn hawng a ni, a ti. Mizoramah industry hlawhtlin loh thinna chhan lian tak pakhat chu loan laten an rulh that loh thin vang a ni a, tunah chuan bank tam zawkin loan pek chhuah an hreh phah tawh a ni tiin Minister chuan tuna RGUMY hnuaia bultan thar turte chu rinawm leh taima tak, tumruhna leh tih tak zetna nena industry din a, loan rulh that a pawimawh thu a sawilang a ni. Mizoram sorkarin programme pawimawh tak mitin huam thei tur NLUP a duan mek thu tarlangin Pu Hiato chuan NLUP hian thingtlang mirethei chauh nilo khawpuia chhungkaw harsa zawkte pawh khaichhuak thei tura a duh vangin sorkar pawhin fimkhur leh uluk taka kalpui a tum thu a sawi a. Sorkar chuan mipuite hamthatna tur ngaihtuah sakin programme tha tak takte a duang chhuak thin a, amaherawhchu heng hmalaknate hlawhtlinna chu a thawktute kutah a innghat tlat a ni tih hre reng turin kalkhawmte a chah a. RGUMY chu thalai lehkhathiam ten eizawnna ngelnghet an neih chho theih nana a bik taka duan a nih thu sawiin Khuallian chuan he programme hian thalaite a tih phur thar a, Mizoram hming pawh a tih that a beisei thu a sawi bawk.

Khual Zahawm Industries Commissioner Pu R.L.Rinawma, IRS pawhin thusawiin Mizoram innghahna ber chu industry lama thawktute (entrepreneurs) hlawhtlinna leh  Mizo hnam beiseina ber a ni bawk, a ti. Mizoram leilung chhengchhe lutuk avangin industry liantham din a harsa hle a, amaherawhchu industry tenau zawk hmangin thalaite eizawnna kawngah dik leh fel taka hruai an nih chuan khawvel hmun dangte el pha khawpin kan insiam chho thei a ni, a ti bawk. Tuna sorkar laipui hnuaia scheme lian pahnih kalpui mek RGUMY leh Prime Minister’s Employment Generation Programme (PMEGP) te hi Mizoramah inrem taka kal kawppui fuh chuan hmasawnna rahbi thar kaina tur a ni thei dawn a ni, a ti a. Thilsiam chhuah ringawt a tawk loh thu sawilangin Pu Rinawma chuan Mizorama thil dehchhuahte hralhchhuahna tur ruhrel (marketing infrastructure) felfai tak duan hmasak a pawimawh ber a, midangte nena inel pha tur chuan bungrua phurh luh leh chhuah (transportation) tih awlsam a tul bawk a ni, a ti.

Rajiv Gandhi Udyami Mitra Yojana (RGUMY) hi thalai lehkhathiam hna hmu lote sumdawnna (entrepreneurship) lama a tul anga training emaw sum leh paia an harsatna te sutkianpui thei tura programme duan a ni a. Sorkar laipui chuan state tinah he programme hmalakna kalpui turin pawl/NGO rawn thlang chhuakin kumin 2009-2010 chhungin entrepreneur 100 tal thun hman tum a ni. Ministry of Micro, Small & Medium Enterprises chuan  Mizoram Entrepreneurship Network(MEN) chu he programme atan thawhpui turin a thlang tawh a. Vawiin RGUMY hawnna inkhawmah hian RGUMY-a in ziak lut duh mi 5 te chu MEN te nen thawhhona thuthlung an ziak nghal bawk a ni.