Rualbanlote dikna leh chanvo tarlanna leh humhalhna Dan - The Rights of Persons with Disabilities Act, 2016 (RPwD Act, 2016) hman a nih atangin rualbanlo chi hrang 7 ni thin kha 21 ah tihpun a lo ni ta a. Kum 2011 Census in a tarlan danin Mizoram-ah rualbanlo mi 15,160 an awm a, mipa 8,198 leh hmeichhia 6,962 an ni.
He RPwD Act ah hian ruaibanlote dikna leh chanvo hrang hrangte tarlan a ni a. Heng chanvo hrang hrang RPwD Act in a tarlan zinga pawimawh zualte chu a hnuai ami ang hi ani;
(1) Office of the Commissioner for Persons with Disabilities hian rualbanloten hma an sawn theihna turin leh an dikna chanvo an hriat a an neih theihna turin nasa takin hma a la a. RPwD Act leh Rules pawh mipui tam zawkin a an hman tangkai theihna turin Mizotawngin a let chhuak tawh a ni.
(2) RPwD Act, 2016 in a phut angin rualbanloten an dikna leh chanvo hrang hrangte an neih theihna tura Committee siam ngaite pawh Mizoram sawrkar in a siam a ni.
(3) Sawrkar Department hnuai a rualbanlo hnathawkten harsatna/lungawilohna an thlenna turin Grievance Redressal Officers ruat an ni.
(4) Rualbanlote zingah Sawrkar hna hi mi 60 velin an hmu tawh a, sawrkar pawhin rualbanlo sawrkar hnathawkten an hnathawhnaah harsatna an tawh loh nan ruahmanna an siam tur a ni.
(5) Promotion chungchangah pawh mi dangte angin dikna an nei a, en hran bik tur an ni lo.
(6) Mi tupawh sawrkar hna a thawh laia tawh sual a tawh avanga rual a banlo a nih pawhin hriatthiam tur an ni.
(7) Zirna sang (Higher education) ah te 5% seat rualbanlote tan hauh tur a ni a, kum lamah pawh kum 5 ngaihhnathiam tur an ni bawk.
(8) Zirna in te hian rualbanlo nih vangin tumah an en hrang tur a ni lo a, infiamna leh intihhlimna kawngah pawh an tlin tawk angin a ngaihtuahpui tur a ni.
(9) Agriculture ram leh in hmun thehna kawngah pawh rualbanlote tan 5 % hauhsak tur a ni a, rualbanlo hmeichhia te duhsak hmasak tur an ni bawk.
(10) Development Programme hrang hrangah leh retheihna umbona (Poverty Alleviation) kawngah pawh 5% hauhsak tur an ni a, hmeichhiate duhsak hmasak tur an ni.
11. Hriatna tha lo (Hearing impaired) sawrkar hnathawkte tan Hospital-a awm kher ngailo in an mamawh bengdar te Dan angin an thlak in an reimburse theih tawh tur thu Finance Department chuan Notification ni 03.09.2018 khan a tichhuak tawh bawk a ni.
12. Sawrkar-a Department hrang hrangah rualbanloten sawrkar hna an hmuh ve theihna turin reservation buatsaih a ni a. Hemi kawnga in zirtirna pawh Mizoram sawrkar hnathawk tan October ni 25 & 26,2018 khan a buatsaih tawh a. He training a zirtirna pe turin mithiam, Institute of Secretariat Training and Management (ISTM), New Delhi atangin an lo kal a, mi 70 bawr vel ni hnih chhung training pek an ni.
13. Mizoram sawrkar chuan rualbanlote hamthatna tur kawng hrang hrang a ngaihtuah a. Rualbanlote dikna leh chanvo puanzarna tur leh mamawh dangte phuhruk nan Commissioner Office pawh cheng nuai 30 (30 lakhs) NEDP hnuaihah a pe bawk a ni.
14. Central Sawrkar pawhin rualbanlote hamthatna hi ngai pawimawh in MZU-ah Centre for Disability Studies chu 05.07.2018 khan a hawng.
15. Rualbanlote tan-a hamthatna hrang hrang awmte dawng tur hian rualbanlo chu a rualbanlohna 40% chin chunglam a ni tur a ni.
16. Guwahati High Court remtihpuina in Law & Judicial Department, Govt, of Mizoram chuan rualbanlote laka hleilenna a awm lohna turin leh hetiang kawng a hma la thei turin District hrang hrang a Magistrate-te chu a ruat tawh bawk a ni.
17. RPwD Act, 2016 chuan rualbanlo chi hrang 7 ni thin kha chi hrang 21-ah a tih pun tak avangin Govt. Medical Officer (doctor) hote tan thil thar tam tak alo piang chho ta a. Assesment & Certification chungchanga harsatna an tawh lohna turin hetiang lama mithiam pahnih Dr. RK. Wadhwa leh Dr. Ajay Gupta, Safdarjung Hospital, Ministry of Health & Family Welfare, Govt, of India, New Delhi te lo kalin March ni 14 & 15, 2019 chhung khan Mizoram Sorkar hnuaia doctor 47-te tan training buatsaih alo ni tawh bawk a ni. Hei hian rualbanlote tana Certificate/ID siam chungchangah chak zawka hma a lak tir theih ngei beisei a ni.
Chiang leh zuala hre duh tan Commissioner Office Chaltlang-ah office hun chhungin zawh fiah theih a ni e.
email : ocfpwd@gmail.com website: www.pwds.mizoram.gov.in
