National Commission for Protection of Child Rights, NCPCR bultum-a Mizoram State Commission for Protection of Child Rights leh School Education Department tangkawpin an buatsaih, 'Pariksha Parv 2.0' sawihona vawiin khan neih a ni.

He sawihona ah hian mithiam bikten exam kaihhnawih thil ah zirlaiten rilru tawt lutuk vanga harsatna an tawh theih dan leh a sutkian dan turte an sawifiah a, NCPCR consultant Pi Ratna Saxena bakah Mizoram University Psychology Dept. hotu Prof. HK Laldinpuii Fente leh Civil Hospital Aizawl-a Psychiatrist Dr Ruth Lalmuanpuii ten zirlai kalkhawmte leh school principal leh headmaster kalkhawmte an zirtir a ni.

Mithiamte sawi danin, ram chhung hmun dangah zirlai tam tak exam kaihhnawih rilru hah vanga mahni intihlum awm thin mahse Mizoramah chuan hetianga mahni nunna la duh khawpa harsatna tawk an la awm lo a, hetihlai hian zirlai tam tak, chhan hrang hrang avanga rilru lama harsatna tawk an awm thung a ni. Mithiamte sawi danin exam kaihhnawih rilru tawt leh hah vanga harsatna pumpelh thei tur hian nu leh pa, zirtirtute leh zirlaiten mawhphurhna hrang an nei theuh a, rilru tawt "stress" ti a sawi chu mitinin an neih, a tawk chauha sang a nih chuan hmanraw tangkai tak a nih thu te, a tawk aia sang a nih erawh chuan taksa leh rilru in a tawrh theih thu te, stress sang lutuk tur laka inveng turin mahni thil thlir dan her rem thiam a tul thu te mithiamte hian an sawi.

Sawi hona hmanpuitu School Education Secretary Pi Esther Lalruatkimi chuan naupangte chu thil ti dik vek tura beisei chi an nih loh thu leh an tlin tawk baka nasa taka nawr tur an nih loh thu a sawi a, zirlaiten nuamti taka an zirlai thahnemngai taka an zir theihna turin zirna boruak tha siamsak an tul tih a sawi.

MSCPCR Chairperson Pi Sangzuali Vanchhawng kaihhruai sawihona-ah hian zirna kaihhnawih-a a mamawh apiangten an biak pawh theih tur RTE Helpline chu School Education Secretary Pi Esther Lalruatkimi hian a tlangzarh nghal a, helpline telephone number 6009888804 hi MSCPCR-in zirna kaihhnawiha hartsatna nei leh thu thlen duh nei ten engtiklai pawha an biak pawh theih tura ruahman a ni.

Pariksha Parv 2.0 puala sawi hona buatsaih hi MSCPCR member, Education changtu Dr Julie Remsangpuii Fambawl chuan kaihhruaiin, huamzau taka sawihona hun hman a ni bawk.