Regional Institute of Paramedical & Nursing Sciences (RIPANS) chuan vawiin khan Graduation & Lamp Lighting Ceremony an nei a, Health Secretary Pi M. Zohmingthangi’n a hmanpui.
RIPANS Director Dr. Chawngthanliana chuan lawmna thu sawiin RIPANS chuan Department hawn belh te, Department tinah zirlai 33 an lak thin chu tih tama zirlai 66 an lakluh theih nan te, Diploma Course zawng zawng Degree Course-a hlankai chhoh leh Library changtlung zawk neih thuai a ni dawn, a ti a. RIPANS Campus chhung ngeia damdawi in khum 500 awm theihna leh Medical & Dental College (100 seats ve ve) dinna tura DPR thehluh a nih tawh thu a sawi bawk.
Health Secretary Pi M. Zohmingthangi chuan vawiina pass chhuak RIPANS zirlai zawng zawngte Certificate leh ti tha zualte hnenah Proficience Award hlanin an kal zelna turah duhsakna sang ber a hlan bawk a ni.
Vawiina RIPANS Graduation-ah hian Department of Nursing 12th Batch atangin zirlai 26, Department of Optometry 13th batch atagin zirlai 16, Department of Radio Imaging & Cardiac Instrumentation Technology atangin zirlai 25, Departmet of pharmacy 4th Batch atangin zirlai 26 leh Department of Medical Laboratory Technology 5th Batch atangin zirlai 20 te an pass a ni.
Graduation rual hian BSc. Nursing zir tur zirlai thar lutte tan Lamp Lighting Ceremony hman nghal a ni a, Mizo nurse zinga Florence Nightingale Award lo dawng tawh Pi K.Thansiami, Asst. Nusing Superintendent (Rtd)-in a hmanpui a ni.
Regional Institute of Paramedical & Nursing Sciences (RIPANS) hi NEC hnuaiah kum 1995-96 khan din a ni a, April ni 1, 2007 atang khan Ministry of Health & Family Welfare, GoI hnuaiah dah a ni. RIPANS-ah hian hmarchhak state 8 atangin zirlaite lutin Degree Course 5 lehDiploma Course 2 zir theih mek a ni a, Mizoram University hnuaiah affliation a nei bawk.
