Nimin khan Art & Culture Minister Pu P.C. Zoramsangliana chuan ni thum awh (10th – 12th October), rualbanlote puala kut UMANG Festival, Multipurpose Cultural Complex Berawtlang a buatsaih chu khuallian niin a kharna programme a hmanpui. Lt. Col. Z S Zuala MLA leh AMC Councillor Nl. Lalrinsangi te pawhin kharna programme hi an hmanpui a ni. He kut hi North East Zone Cultural Centre (NEZCC) Dimapur leh Art & Culture Department tangkawp ten an buatsaih a ni.

Pu P.C. Zoram Sangliana chuan rualbanlo naupang, vohbik naupangte chu mi tin in hmangaihna, duhsakna leh lainatna te chu engtik lai pawhin a taka lantira, tanpuina an pek thin te chu uar zel turin Mizo mipuite a ngen a. Tanpuina kan pek avangin heng naupangte mamawh tam tak te chu an enkawl tute an pe thei a ni tiin hlimna kan pek bakah mahni pawh a leta kan hlim theih thu a sawi.

Pu P.C. Zoram Sangliana chuan heng naupang zirtirtute inpekna leh an hnathawh chu fakawm tiin duat taka zirtirtuten an enkawl a, naupang pangngai tih theih ang ti thei tura an chherchhuak chu ropui a tih thu a sawi.

Tun tum UMANG Festival buatsaih hi a vawithumna niin Special School pasarih atangin zirlai mipa 19 leh hmeichhia 22 leh zirtirtu 12 te an riak lut a ni. Ni thum chung hian Doormat Making Worshop neihpui a nih bakah lam leh zai te zirtir an ni bawk a ni. Aizawl khawpui atangin Special School panga – Gilead Special School; Moriah Blind School Luangmual; Special Blind School Durtlang leh Zonuam Primary School leh Aizawl pawn atangin sikul pathum – Shalom Special School Serchhip; Gideon Special School Champhai leh Integrated Blind School Kolasib te an tel a ni.