561/2025-2026

New Delhi, the 24th of May, 2025: Vawiin khan Bharat Mandapam, New Delhi-a ‘Rising Northeast Investors Summit’, Sumdawng lian intawh khawmna hunah Minister Pu Lalnghinglova Hmar chuan thu sawiin Sumdawng lian ho chu Mizoram lam rawn hawi turin a sawm a. Northeast India, a bikin Mizoram chuan Tourism, Sports leh Entertainment-ah te theihna sang tak a nei a ni tiin investor te chu Mizoram-a zin tur leh sumdawnna kawng rawn zawng turin a sawm.

Ministry of Development of North Eastern Region (DoNER) buatsaih ‘Rising Northeast Investors Summit 2025’ hi May ni 23-24, 2024 chhung neih a ni a. Nimin khan Prime Minister Pu Narendra Modi chuan hawngin, a hawnna-ah hian Mizoram Chief Minister Pu Lalduhoma chu a tel a. Ni hnih chhung hian India ram hmun hrang hrang atanga investor fuankhawm hmaah Northeast India a potential awmte tarlana sawiho a ni.

Tourism Minister Pu Lalnghinglova Hmar chuan chawhma session-ah “Northeast: The New Hub of Tourism and Hospitality” thupuiah thu sawiin, Northeast India pumpui chu Odisha aia mihring tlem zawk, area-ah pawh UP tiat vel chauh ni mahse khuarel mawina in a tuam vel, boruak thianghlim leh culture hausa, tourism-a theihna sang tak nei a ni, a ti a. “ASEAN ram te nena inhnaih leh inkalpawh awlsam a ni a, Act East Policy hlawhtlinna atan pawh dinhmun pawimawh tak a luah a a ni”, tiin investor te chu Northeast lam hawi turin a sawm.

Pu Lalnghinglova Hmar chuan a bik takin Mizoram in adventure tourism ah theihna sang tak a nei a ti a. “Mizoramin theihna a neih thu sawi ringawt kan duhtawk tawh lo a, a taka chantir tumin theihtawpin hma kan la mek. Red Bull nen tangkawpin nikumah Asia rama Urban Downhill mountain bike racing hmasa ber chu Aizawlah kan buatsaih a, kuminah pawh kan ti leh dawn.” a ti. Mizoram-a Christmas lawm dan, a bikin veng tin khaw tin a ruaitheh chu hmundanga awm ve lo, rampawn thlenga tihlar leh zawrh tlak a nih thu a sawi a. “Northeast hi hmun kilkhawr a ni tawh lo. Mizoram pawh Delhi atangin darkar hnih leh a chanve ah a thlen theih a, Kolkata atang phei chuan minute 45 chauh a ni” tiin, Aizawl bul thleng rel a luh tawh dawn avangin investor te tan remchanna a inhawng dawn tih a sawi a ni.

Mizoram Tourism Minister chuan Mizorama Dampa Wildlife Sanctuary chu Asia rama clouded leopard concentration sanna ber a ni tih a tarlang a. Aizawl chu India rama traffic dan zawm that berna khawpui a ni tiin, Mizoram chu state ralmuang, India rama ziak leh chhiar thiam 100% a puan hmasak ber a nih thu a tarlang bawk a ni. Minister hi Industry hruaitute leh tourism lama mithiamte nen panel-ah a tel zui a ni.