Nikum kha Swami Vivekananda pianchampha phak vawi 150-na a ni a, chumi denchen chuan Ram puma hmun hrang hrangah te Ramakrishna Mission chuan Sawrkar Laipuia Ministry of Sports and Youth Services puihna in Youth Convention an buatsaih a, vawiin Ramakrishna Mission, Cherrapunjee chuan Vanapa Hall-ah hetiang Regional Level Youth Convention chu an buatsaih a ni.

He programme hmanpui tur hian Ramakrishna Mission hmunpui Belur Math atangin General Secretary Swami Suhitanandaji Maharaj leh Swami Vishwatmanandaji Maharaj, Coordinator, Central Executive Committee for Celebration of 150th Birth Anniversary of Swami Vivekananda te chu an rawn kal a, anni pahnih te hian Swami Viveknanda chanchin tlangpui te sawiin, ram tana ah in pekna, zirna atana a hnathawh leh ram leh hnam inpumkhatna atana hma a lak chho dan te an sawi bawk.

He hunah hian RK Mission School Cherrapunjee atanga Mizo leh Mizoram mi lo zirchhuak tawh engemawzat an tel a, chung zing atang chuan Pu Rosiama Vanchhawng, IFS, Addl.PCCF; Pu Siamhranga, Teacher, GMHHS, Pu Sanghrima Chongthu, EE, PWD leh Pu Nirupam Chakma, Ex-Minister, Mizoram te chuan thusawiin he sikul atana zirna tha leh zirna ziktluak an hmuh thu an sawi a ni. Pu Lalsawta IAS (Bihar Cadre) pawh he sikul chhuak a ni.

Ramakrishna Mission hian ram pum hmun hranga sikul leh damdawiin engemawzat an nei a, an zirna chu tha tak tak niin an dawmdawiin te chu mi harsa leh mi chanhai te chawr tangkai hle a ni.

Swami Vivekananda hian thalai a vein thalai te hmakhuana tur leh an dinhmun te ngaituahin an tana hma thlir zau tak a nei thin a, a piancham January ni 12 hi kum 1985 khan National Youth Day-ah puan a lo ni nghe nghe a ni.