State Election Commission (SEC), Mizoram chuan Lai Autonomous District Council (LADC) hnuaia Village Councils 93-ah Inthlanpui vawi 13-na 25th March, 2014 hian a buatsaih dawn. Inthlanpui ni tur hi vawiin khan Pu H.Darzika, Secretary, SEC chuan a pisaah a puang a ni.
He inthlanah hian Mizorama a vawikhatna atan Village Council 93-ah te hian seat awm zawng zawng atangin seat 1 zel hmeichhe tana hauhsak a ni a, hmeichhe Village Council Member thar 93 an awm thei dawn tihna a ni. Hmeichhia te hian seat hauhsak bakah general seat pawh an chuh thei bawk ang. Reserve seat a hmeichhe in candidate te tan ballot paper pawh a hrana siam a ni dawn a ni.
He inthlan atan hian Observer 3 leh Sector Officer 10 ruat an ni a. Sensitive Polling Station a awm dawn loh avangin, civil society te inthlanna muanawm leh felfai neih a nih theih nan tangkai taka hman tum a ni.
‘Model Code of Conduct for Elections to Village Council under Autonomous District Councils in Mizoram’ chu inthlan neih ni tur puan ni vawiin ni 19th February, 2014 atang hian inthlanpui neihna tur Village Council 93 huam chhungah hman tan nghal a ni a. He Model Code of Conduct hian Political Parties, inthlan chuh tur candidates, Ministers, Parliamentary Secretaries, Members of Parliament, Members of Legislative Assembly, Chief Executive Member, Executive Members, Members of District Council leh Village Council inthlanna a inhnamhnawih Public Servant te a huam ang.
Vote tla hi vote thlak ni ni 25th March, 2014-ah vote thlak zawh a nih veleh chhiar nghal a ni ang a. Inthlan that ngai a awm a nih chuan ni 26th March,2014-ah inthlan thatna neih tura ruahman a ni.
Mizorama a vawikhatna atan he Village Council member thlan tlin te hian kum 5 term an chelh dawn a. Hei bakah hian Village Assembly, vote nei zawng zawng telna, din a ni ang a, he Assembly hian Village Council hnathawh an endik thin dawn a ni.
LADC-ah hian vote nei thei mi 45,710 an awm a, heng zinga mi 22,398 chu mipa niin, mi 23,312 chu hmeichhia an ni. LADC Area chhungah hian In 12,710 a awm a, Village Council chhunga In 50-150 awm chinin V/C seat 4, In 151-300 in seat 5 leh In 301 atanga a chung lamin seat 7 zel an nei thei a ni.
LADC hnuai a Village Council inthlan hi State Election Commission –in a buatsaih dawn avang te, hmeichhe tan Village Council tinah seat hauhsak a nih avang leh Village Council term kum 5 a siam anih vang te in Rajiv Gandhi Panchayat Sakshaktikaran Abhiyan (RGPSA) hnuaiah hmasawnna sum an dawn theih phah dawn a ni.
SEC chuan inthlanna felfai leh muanawm neih a nih theih nan inthlanna buaipuitute, Political Parties, Media, NGO’s leh mipui tawiawmna a ngen a. Mipui duhthlanna kaltlanga tualchhung inrelbawlna tha tak neih a nih theih nana theihtawp chhuah theuh turin LADC hnuaia khaw 93-a mipuite a sawm a ni.
He inthlan chungchanga mipuite hriat tur pawimawh chu SEC website www.secmizoram.in ah tarlan thin a ni ang a, hemi bakah thil hriatfiah duh leh zawh duh neite chuan SEC e-mail id : sec-mizoram@yahoo.com ah zawhfiah theih a ni ang.
