Kumin 2012 a Mizote zinga Padma Shri Award dawngtu Prof.R.L.Thanmawia chuan a chawimawina dawn, Synod Conference Centre a a lawmna a buatsaih chu Chief Minister Pu Lal Thanhawla chuan a hmanpui a, Prof R.L.Thanmawia kutchhuak lehkhabu 3 tlangzarhna neih a ni bawk.

Chief Minister chuan Mizote tana tangkai tak tur, lehkhabu tha tak tak tlangzarh a ni chu chawimawina dawn lawmna a ti ropui zual hle a ni a ti a. Lehkhabu tha tihchhuah lamah sorkar pawhin tan ala reng a ni a ti a. Kan tu leh fa te hnena rohlu kan hnutchhiah theih tha ber chu education hi a ni tiin, sorkar pawhin kan hnam siam that nan education hi hmanruaah hmangin Education Reforms Commission te a din a ni a ti a. Sum tam tak sen a ngaih dawn avangin a kal chakpui theih loh a ni a ti.

Chief Minister chuan kumin 2012 a hmarchhak state 3 zinga Padma Shri dawng zingah Mizo kan tel ve chu a lawmawm takzet a ni a ti a. Civil mite chauh ina dawn theih, Padma Shri hi ‘Title’ anga hman chi a nilo a ti. Chief Minister chuan Mizote hi literature ah kan hausa hle a, chutih rualin kan tawng hman danah kan uluk tawk loh avangin kan tichhe mai ang tih a hlauhawm a ni a ti a. Chuvangin kan tawngte, kan thil hlui leh rohlu kan neihte hi a nihna anga vawnhima, humhalh tlat hi kan tih tur a ni a ti a. Cheimawi kan tum na lamah a hlutna tiboin, tam tak hmuh tlak lova kan siamte hi a pawi hle a ni a ti.

Prof R.L.Thanmawia’n Padma Shri a dawng thei hi sorkar ang leh a mimal angin kan lawmpui tak meuh a ni tiin, Chief Minister chuan he chawimawina hi midangte tan entawn tlak leh tan lak tirtu ni ngei se a duhthu a sawi bawk a ni.

Lehkhabu dang 2 te hi Home Minister Pu R.Lalzirliana leh Art & Culture Minister Pu P.C. Zoramsangliana ten an tlangzarh bawk a, thusawina hun an hmang bawk a ni.

India a civil mite chawimawina sang ber chu Bharat Ratna a ni a, chumi hnuaiah chuan Padma Award 3 awmin, Padma Vibhushan, Padma Bhushan leh Padma Shri ten an dawt a. Kum 1954 a sem tan, Padma Shri dawng thei tur hian mahni state theuh sorkarin criminal case neilo, dawng tlaka a hriatte chu Home Ministry ah thawn thla in, Home Ministry hian uluk taka alo endik hnuah kawng hrang hrang arts, music, dance, literature & education, social works,sports, science leh a dang tam tak line hrang hrang a mi chungchuang leh thawh hlawkte chu a thlang thin a ni. Padma Shri hi Mizo 21 in literature & education ah te, social works leh civil service ah te an dawng tawh a. Kum 2007 khan Padma Shri chung chiah Padma Bhushan chawimawina hi Capt L.Z.Sailo hnenah hlan alo ni tawh bawk a ni.

Literature & education hnuaia Padma Shri dawngtu,Prof R.L.Thanmawia hian essay leh article 300 chuang a ziak tawh a, hla 45 phuahin, lemchan 5 a ziak tawh bawk a, a lehkhabu ziah 22 tichhuah a ni tawh a. Zirlai class II atanga University thlenga zirlai(text bu) lehkhabu zir tur a ziak bawk a. Hengte bakah hian thawnthu tawi, leh naupang hla tam tak a ziak bawk a ni.

Lawmpuina thilpek mimal ang leh pawl ang atangin thahnem tak Prof R.L.Thanmawia hi hlan a ni bawk a. Padma Shri lo dawng tawh mi 5 in lawmpuina hun hi an rawn hmanpui bawk a ni.