Vawiin chawhnu dar 1 khan CM Conference Hall-ah mi pawimawh tlemte sawmte hmaah Pu Lal Thanhawla Chief Minister chuan Rural Land Use Plan for New Land Use Project (RLUP for NLUP) (Mizoram ram theh leh hman tangkai dan) lehkhabu a tlangzarh.

He hun pawimawh taka thusawiin, Chief Minister chuan, “Ram theh dan mumal tak kan neih loh thin avangin buaina tam tak kan tawk thin a, hetianga taima taka hun hlu tak senga khaw 600 chuang tlawh a, lehkhabu siam a ni thei ta hi a siamtu Dr. James L.T. Thanga, Project Director, RLUP for NLUP leh a thawhpuite thawhrimna avangin lawmthu ka sawi a ni” a ti.

Pu Lal Thanhawla chuan, tunhnaia leimin leh leitawlh avanga tuar (Ramhlun leh Laipuitlang ami) te tan Chite Luiah ram zau leh tha tak lei anih tur thu leh chuta awm tak tak tur tan chuan a In pawh sak sak an nih tur thu te, In 50 vel tana lei anih laiin In 100 len theihna tur anih avangin a tehna leh leina ah pawh fimkhur a tul a, tuten emaw an lo insah thlak sak mai mai a rem dawn loh thu a sawi bawk.

Dr. James L.T. Thanga, Project Director, RLUP for NLUP, he lehkhabu buatsaihna atana puipa ber leh sulsutu chuan Mizoram in Dan mumal a neih loh vanga harsatna awm thin sutkian nan leh hman tangkai turin lehkhabu Volume 3 an siam chu hautak hle mahse ram mipui tan tangkai ngei tura beiseina avangin lawmawm a tih thu a sawi a, NLUP Implementing Board ten a tul apiangah harsatna awm lova an puihna ah lawmthu a sawi.

He lehkhabu hi Chief Minister-in Mizoram mai nilo, state dangte tan pawh a tangkai tura a ngaih avangin central hotute bakah Planning Commission Vice Chirman hnenah advance copy a lo pe tawh a ni. Vawiin lehkhabu tlangzarh hi Pu P.L. Thanga, Vice Chairman, NLUP Implementing Board in a kaihruai a, Pu R.L. Rinawma, Principal Secretary, Land Revenue & Settlement in lawmthu sawina a nei bawk.

Mizoram Gazette ah August 30, 2013 khan Governor chuan Revenue Department Officer-te hnenah NLUP dawngtute chu kum 2 chhung ram hawh tir dan leh an hnathawhin a zir chuan pawhsei zel dan a lo siam sak tawh a ni.

Attachment

  • Loading attachment...