Kum 2017-18 chhunga Mizoram sawrkarin Reproductive, Maternal, Newborn, Child and Adolescent Health (RMNCH+A) hmalakna a kalpui dan thlirletna hun chu vawiin atanga tanin Tourist Lodge, Aizawlah ni thum chhung neih a ni dawn a. Pu Lal Thanzara chuan review meeting hi hawngin Pradhan Mantri Surakshit Matritva Abhiyan (PMSMA) ah naupai en tam ber category-ah hmarchhak state zinga ti tha ber lawmman Mizoramin a dawn lawmna hun hman nghal a ni bawk.

Pu Lal Thanzara chuan National Health Policy 2017 hnuaiah Mizoram chuan target neiin kum 2020-ah nu naupai lai leh nauchunga thi zat tehna MMR chu 100 ah a tlahniam tur a ni a,  Infant Mortality Rate chu kum 2019 ah 28, kum 5 hnuai lam thihna chu kum 2025 ah 23, Neonatal Mortality Rate chu kum 2025 ah 16 ah tla thla hman tura beisei kan ni, a ti a. Review Meeting neih turah an hnathawh dan uluk taka thlirlet a, an tih thatna leh tih that tawk lohna te zirchiang a, target bituk hlen ngei tura hma la turin kalkhawmte a chah a ni. Health Minister chuan sawrkarin mipui hriselna a ngaih pawimawh avangin District Hospital zawng zawng leh MIMER, Falkawnah damlo enkawlna hmanraw chang kang tam tak lei thar a ni a, phai damdawi in liana damlo refer ngai zat pawh a tlem phah nasa hle a ni, a ti a. Hriselna kawnga hmalakna hrang hrangah Mizoramin hma a sawn chho ve zel tiin hmarchhak state chauh ni lo ram pum huapa hnathawh dan thlirhonaah State titha pawl kan ni ve thin chu a lawmawm tak zet a ni, a ti. Nu naupaite hriselna enkawl kawnga hmalakna pawimawh tak PMSMA-ah naupai en tam ber huangah North East State zinga titha ber lawmman Mizoramin a dawng chu a lawmawm tak zet a, sawrkara thawktu mai ni lo private a thawk obstetrician leh doctor engemawzat, naupai te en tura a thlawna in pe te chungah lawm thu Health Minister chuan a sawi a ni. 

Ministry of Health & Family Welfare, Government of India in a buatsaih ‘IPledgeFor9’ Achievers Award 2018 ah Mizoram hian PMSMA Team Award a dawng a. June 29, 2018 khan Department aiawhin Mission Director (NHM) Dr. Lalrozama, IAS leh RCH Special Programme Officer Dr Hmingthanmawii ten New Delhi ah Union Health Minister Pu JP Nadda hnen atangin an dawng a. He award hian citation leh memento a keng tel. PMSMA hnuaiah hian nu naupai, thla 4 atanga thla 9 inkar chuan nau an pai chhungin thla thar ni 9 apiangah vawikhat tal an naupai chu doctor ten an en tur a ni, tih a ni a. Ultrasound leh test hrang hrang te pawh he programme hnuaiah hian a thlawn vek a tih a ni. District Hospital, Sub-District Hospital, Community Health Centre leh Public Health Centre ah te he programme hi thla thar ni 9 apianga kalpui thin a ni. He programme in a tum ber chu nu, raicheha thi tih tlem leh tha taka nau an neih theihna tur atana enkawlna tha pek a ni. 

PMSMA Volunteer doctor 7- Dr. R. Lianzama, Dr. RL Dangvela, Dr. P Lalramzauva, Dr Abhirami B, Dr Mohanapriya S, Dr Eileen Lalrinpuii leh Dr. R.Lalhmingliana te hnenah lawmthu sawina thuziak Health Minister Pu Lal Thanzara hian a hlan a ni. 

Vawiin programme hi NHM Mission Director  Dr. Lalrozama, IAS chuan a kaihruai a. Dr Hmingthanmawii’n PMSMA Award chungchang leh RMNCH+A hmalak dan tlangpui a sawi a. Dr.H. Lalchungnunga, Director, Health Services chuan lawmthu sawiin hun a khar a ni. Review meeting ah hian Health Commissioner & Secretary Pu Lalrinliana Fanai, IAS hovin RCH programme a thawktute, doctor te leh mi pawimawh dangte an tel a ni.