Mizoram Rasthriya Madhyamik Shiksha Abhiyan (RMSA) hmalakna kal zelah Government Secondary School leh RMSA School thara zirtirtute tan Mizoram pawnah study tour neih a ni ta. Vawiin chhun dar 12:30 khan RMSA Mission State Project Director Pu T. Rohmingliana’n Aizawl District chhunga High School zirtirtu thlan chhuah zin chhuak turte hi Mc. Donald Hill-a Teachers Inn bul atangin a vai liam.
RMSA hmalakna in Govt. Secondary School a zirtirtute tan leh RMSA School thar, kumin atanga class tante tan study tour hi neih a ni ta a. Hei hi zirtirtute intuaihriam zel nan leh an khawhawi a zau zawk theih nana ruahman a ni. Kumin chhung hian Mizoram District hrang hrang zirtirtu 762 study tour a tirhchhuah an ni dawn a. Zirtirtu zin turte hi District tina RMSA office ten an buaipui mek a, kuminah hi chuan Kolkatta ah hmun pawimawh chi hrang hrang fanpui an ni dawn a ni. Vawiina chhuak Aizawl District a zirtirtute hi 21 an ni a, Lengpui Airport atangin an thlawk chhuak ang a, Kolkatta-ah ni 2 chhung hmun hrang hrang an fankual hnuah thlawhna bawkin an lo let leh dawn a ni. Zirtirtute bakah hian naupang thlanchhuah 520 te pawh state pawnah tirhchhuah an ni dawn bawk.
Tun hnaia State Education Secretary te New Delhi-a conference an neih ah chuan State tina RMSA ten an state chhunga kawng hrang hrang a school leh naupangte dinhmun tarlanna Secondary Education Management Information System (SEMIS) Data an thehluh ah State tam takin zaa 40 chuangte an tihsual laiin Mizoram chu tih dik loh nei tlem state pathum zinga pakhat a ni tih tarlan a ni a. SEMIS Data hi RMSA plan siam innghahna bulpui a nih avangin a pawimawh hle a.
SEMIS Data a dik tawh loh chuan plan siamah harsatna tam tak a awm zui a, Ministry atanga sum dil chhuah a har hle tawh thin. Mizoram bakah hian Bihar leh Tamil Nadu te chu tih dik loh nei tlem zinga mi an ni. SEMIS Data ti dik lo tam, tih dik loh zaa 40 aia tam mah nei State 9 zingah India hmarchhak a mi Nagaland, Arunachal Pradesh leh Meghalaya te pawh an tel a. Zaa 30-40 ti dik lo state 21 lai an awm a, Mizoram, Bihar leh Tamil Nadu te hi tih dik loh nei tlem awm chhun an ni tih he meeting ah hian tarlan a ni.
RMSA school leh Govt. High School a teacher te tan kumin chhung hian study tour bakah hian art camp te, self defence for girls te, local study tour te, District level science exhibition buatsaih a ni dawn a. Naupangten Mathematics lama harsatna an neih loh Mathematics lab. Kit pawh lei tura remtih a ni tawh a, tunah hian hma lak tan mek a ni.
Hmun hrang hranga RMSA school tharah naupangten school an kal tan tawh a, building leh furniture thar vekah, zirtirtu qualified ten an zirtir tan a. RMSA School hi khaw lian vak lo High school la awm lohna hmuna din leh sakte an nih hlawm avangin hmun thenkhatah phei chuan naupang an awm lo mai awm mang e, tih mai turte pawh an ni ve a. Mahse, school tan anih meuh chuan naupang an lut tha viau hlawm a, naupang nei mang lo tura ngaiha pawh 30/40 te an admit thei a, heng naupangte hi an inzir puitlin ngei theih nan tha taka enkawl zui an ni dawn a ni.
