Vawiin chhun dar 12:00 khan PIB Conference Hall-ah State Election Commission (SEC) hotute leh NLUP Line Department hotute an thu khawm a, VC/LC General Election zawh hma chuan NLUP sum sem rih tawh loh nise, tih an rel.

Pu C. Ropianga, Chief Election Commissioner chuan, kum 2009 atangin SEC chu din niin, election an buaipui tan thu sawiin, bul tantir an nih avangin mipui, Political party leh Media lam mite pawhin Election Model Code of Conduct hi an hre chiang hrih lo hle a, NLUP angah te a kal pui theih leh theih loh dan an han puan te pawh dan thar nilo, dan awmsa, he project bik atan an hrilhfiahna mai a ni a, mahse an hriatthiam tlat loh chuan, sum sem tur kalpui tawh sa pawh, sem tawh loh ni mai se tiin, Line department hotute chu a hrilh a ni.

Election dan ah chuan tih tur leh tih loh tur a awm Election Model Code of Conduct bakah, State sorkarin a khap te leh Supreme Court in a khap te thlengin bawh chhiat phal a nilova, Election felfai tak nei turin, tu mah tan bik neilova, State Election Commission chuan hma a lak zel tur thu sawiin, ‘Dan leh hrai awm ang te hi kan hre chianga, State danga an tih dante hi kan chiang a ni tih Pu Ropianga chuan a sawi bawk.

NLUP Line Department hotute chu an Department in NLUP sum sem chhunzawm lo turin District hrang hranga an naute hrilh nghal tura ngenin, Pu Ropianga chuan “Inthlanna felfai nei turin tangtlang ang u” a ti a ni.