New Delhi a cham mek Pu P.C. Zoram Sangliana, Transport Minister chuan ni 10.02.2012 khan Tlawng luia inkalpawhna (Inland Water Transport) project chungchangah Ministry of Shipping official te a kawm a, he project atana sum la release loh fourth installment chu tun financial year chhunga pek turin an sawi fel a. Hei hi tun ni hnih ni thum chhunga sanction hman beisei a ni. Tut, Tuichawng leh lui dang atan pawh kum thar lamah sum pek tiam a ni bawk.

Transport department hnuaia project dang pahnih, Pilot Project for Creation of Efficient Transportation Facilities in Rural Areas leh Establishment of Driving Institute at South Hlimen te erawh chu hun a chawpchilh deuh tawh avangin financial year thara tihfel an lo tiam bawk.

Vawiin khan Transport Development Council Meeting vawi 34-na, Union Minister, Road Transport & Highways, Pu C.P. Joshi hova State Transport Minister te leh Official te inhmuh khawmna ah Pu P.C. Zoram Sangliana, Transport Minister hi a tel a. He meeting ah hian ram pum huap a lirthei chhiah lak dan inrual tlang a hman dan tur te rel a ni. He meeting hi chawhnu lamah workshop neih chhunzawm a ni.

Minister hi naktuk ni 14.02.2012 hian Aizawl a lo thleng ang a, New Delhi a Mizoram mamawh buaipuia mi pawimawh hrang hrang a kawm naah hian Pu V. Zaithanmawia, Deputy Liaison Officer, New Delhi in a tawiawm a ni.