Rashtriya Madhyamik Shiksha Abhiyan (RMSA) hnathawh dan thlir letna meeting chu 4th- 6th Jan 2012 ah New Delhi-a Vigyan Bhawan-ah a neih a ni a. He meeting ah hian kum 2009-10 Plan siam atanga Civil works lama hnathawh dan tarlanah chuan Hmarchhak state zingah Mizoram chu hnathawh ngah leh thawk chak, School la awm ngai lohna hmuna New School building sa zo awmchhun a ni tih tarlan a ni. Arunachal Pradesh leh Assam-ah chuan Central sorkar atangin hnathawhna tur sum sanction engmah a la awm lova, Manipur-ah hna an thawk mek a, Meghalaya leh Nagaland-ah chuan engmah hmasawnna hnathawh report tur a la awm lova, Tripura-ah sorkar School awmsa thuambelhna (Strengthening) thawh zawh tawh leh thawh mek engemawzat a awm a, Mizoram-ah chuan School thar 15 sak zawh tawh a ni a, hengte hi Krismas hma khan kumthara class tan thei turin hawn vek an ni tawh a ni.

School thar dang 8 sak mek a ni a, 4 chu January thla chhunga hawn leh hman tum a ni. Mizoramah hian Sorkar school awmsa thuambelhna(strengthening) kalpui mek a ni a. Heng zingah hian Additional class room 30 sak zawh tawh a niin 250 chu sak mek a ni. Science Laboratory 32 sak zawh tawh a niin 101 sak mek a ni . Computer room 40 sak zawh tawh a ni a, 114 la sak mek a ni bawk a. Art/Craft room 42 sak zawh tawh a ni a, 112 sak mek a ni. Library 33 sak zawh tawh a niin 99 sak mek a ni a. Inthiarna mipa leh hmeichhe tan a hrang ve ve leh tui in tur thianghlim dahna 45 chu siam zawh tawh a ni a, 82 ah hnathawh mek a ni bawk. High School-ah hian hmun tam takah inthiarna a that loh avangin hmeichhe naupangten zun an hreh phah a, an hriselna pawhin a tuar phah thin a. Tunah erawh chuan mipa leh hmeichhe tan inthiarna tha tak a awm tawh dawn avangin hmeichhe naupang zinga harsatna awm hi a kiang thei dawn ta a ni.

India ram pumah Secondary School (High School) la awm ngai lohna hmuna School building thar sa state awmchhun te chu Mizoram , Punjab leh Tamil Nadu te an ni a. Punjab ah hian 65 sak zawh tawh a ni a, 5 dang an sa mek a, Tamil Nadu-ah new school 28 an sa zo tawh a, 172 an sa mek bawk. State dangte chuan an la sa mek a, sak zawh an la nei lo a ni.

RMSA hmalaknaah hian state chhunga zirna lama hnufual deuh Block te chu Educationally Backward Blocks ( EBBs) tih a ni a. Zirna lama hnufual leh ziak leh chhiar thiam lo ngah te, state chhunga zirna khairual lo apiangah EBBs hi a tam a. EBBs ngah apiangin hemi behchhan hian Plan siam tur an ngah thin a. Mizoramah EBB awmchhun Lungsen Block ah hian chak taka hma lak mek a ni. EBBs hi Manipur-ah 5, Meghalaya ah 9, Nagaland ah 11, Tripura ah 9, Arunachal Pradesh ah 38 leh Assam-ah 81 a awm. State thenawm te hian EBBs an ngah avangin 2011-12 plan ah pawh hemi behchhan hian Model School leh Girls Hostel sak nan Mizoram ai in sum an hmu hnem deuh dawn a, a chhan chu zirna lama hnufual deuh lai block an ngah vang a ni.

Hmarchhak state te zingah Mizoramah chuah hian RMSA hnuaia zirtirtu leh Lab attendant la awmchhun an ni a, Kum tharah anmahni school ah theuh class tan thei turin an inbuatsaih mek a ni.