RMSA hnuaia Self Defense Scheme for Girls chu vawiin khan Champhai District tan hawn a ni. He ruahmanna hian District chhunga Sorkar High School zawng zawng a huam ang a, mahni invenhimna atan zirlai hmeichhiate chu Taekwondo zirtir an niin, session thar atanga tan tur a ni.

Hawnna hi Govt. GM High School-ah neih niin, Pu C.Hualrikhuma, Dy DPC (RMSA) chuan a kaihhruai a. DEO leh DPC RMSA Pu C.Rodala chuan he scheme hi a hawng a. Hawnna thu sawiin DEO Pu C.Rodala chuan, tunlai khawvel thlirin hmeichhiate hian mahni inveng thei tura thiam thil an neih a ngai tawh a. Tunlaia India rama titi luahtu ber chu pawngsualna thleng tam lutuk hi niin, hmeichhiate an him lo hle niin a lang a. Tawhsual hi tute pawhin tawk thei an ni a, a bikin hmeichhiate chuan mahni invenhim dan an hriat a tul niin Sorkar chuan a ngai a, Self Defence Scheme for Girls hi a duang chhuak ta a ni, a ti a.

Martial arts peng hrang hrangte hi mahni invenhimna a nih theih dan DEO chuan tarlangin, mahni invenhimna zirna hian taksa sawizawina a kentel tur thu leh, an zirlai pangngai puitu a nih beiseiin, tangkai taka a zirtu zirlai hmeichhe naupangten an hman a beisei thu a sawi bawk.

He hunah hian Pu C.Lalremliana, District Child Welfare Committee Member chuan thu sawi bawkin, Mizoramah hian pawngsual hi a tuartu chhungte chuan mualphonaa ngaiin an ngawih bopui mai thin a, thenkhatin sum hmangin inremna an siam thin a, mahse a tuartu tak rilru natna hriatpui a, dan hnuaiah he pawikhawihna hi chinfel ngei ngei tur a nih thu te sawiin, zirlaite chu mahni inveng thei tura thiam thil nei turin a fuih a ni.