Vawiin chawhma dar 11 khan Sangau ah pawh Lawngtlai District hmun dang te rualin Fire Prevention Week 2016 hman a ni a. Sangau BDO Pu Vanlaltanpuia, MCS chu khuallian a ni.
Pu Vanlaltanpuia chuan thu sawiin ram tikangtute chu ram hmelma an ni, a ti a ram tikang lo tur leh ram tikang thei thil laka fihlim turin Sangau Block huamchhunga khawtin VC te leh mipuite a chah a ni.
He hunah hian Mizoram Forest Sangau Range RO pu Lalthanzama leh Range Officer (Revenue) LADC, Pu S. Rammawia pawhin thu an sawi a. Zaithiam tak tak ten kalkhawmte zaiin an awi bawk.
He hun hi pu LS Lalhmingthanga President, YLA Sangau Sub-Headquarter in kaihruaiin Rev H. Lalsangvunga BCM, Sangau in hunserh a hmang a, khawtlang mipui leh zirlai naupang thahnem tak an tel a ni.
Sangau ang bawkin vawiin hian Bualpui Ng, Chawngte ah leh Bungtlang South ah te pawh Fire Prevention Week 2016 hawnna an hmang ve bawk a ni.
State Level Fire Prevention Committee in ruahmanna a siam ang chuan nimin Dt 10.2.2016 khan a rualin he hun hi hman tura tih a ni a, amaherawh chu Thingkah ah Home Minister in 3rd IR Battalion hmunpui tur Lungphum a phumni atana ruahmanna lo awm sa a awm avangin vawiinah Lawngtlai District chuan he hun hi a hmang ta zawk a ni.
