4345/2024-2025

Dated Hnahthial, the 19th February, 2025: Lirthei chetsualna laka him nana fimkhur uar thla, Road Safety Month, 2025 chu vawiin khan Hnahthial DC Conference Hall-ah Addl DC Pu Zothanmawia Khiangte chuan khuallian niin a hawng a. He hun hi Addl SP, Pu Lalhmangaihhlua chuan kaihruaiin Head of Office-te leh tlawmngai pawl hruaitute an tel a ni.

Khuallian chuan Road Safety Month hi Ministry of Road Transport and Highways (MoRTH) thuchhuak angin kum tin, 2021 atang khan hman thin a nih thu sawiin tun kum chu Mizoramah chuan District tinah February thla chhunga hman tur a nih thu a sawi a. India ramah kum 2023 chhung khan mi nuai 1.7 ngawt mai lirthei chesual vanga nunna chan an awm thu sawiin chu chuan lirthei khalh fimkhur a tul zia a tarlan thu a sawi a. Heng lirthei chetsualna za zela  sawmsarih panga (75%) chu a khalhtu (driver)thiamloh a nih thu sawiin Ruih vang te, Wrong side a tlan vang te leh Mobile phone khawih vanga chesual leh nunna chan hi a tam zawk an nih thu a sawi a. Chuvang chuan lirthei khalhtute an fimkhur a tul takzet a ni a ti.

Sawrkar laipui pawhin Motor Vehicle Act dan bawhchhia hi a ngaih thutak em avangin Head Constable chin tan dan bawhchhiate chu man mai nilo, pawisa chawitir theihna thuneihna a pe a ni a ti a. Licence nei lo, kum tling lo lirthei khalh an man te chu a khalhtu ni lovin a khalhtu nu leh pa te hrem theih an nih thu a sawi a. Hei bakah hian kum khat chhung vehicle license registration cancel sak theih an nih bakah Rs 25,000 thleng chawitir theih an ni a ti bawk.

Addl DC Pu Zothanmawia Khiangte chuan dan siam hi keimahni himna tur atan a nih thu sawiin mipuite chu tha taka zawm turin a ngen a. Hei bakah hian lirthei hralh tur ten khuareiah buaina an tawh loh nan Neitu nihna inhlanchhawnna (Ownership Transfer) tih ngei ngei tur a ni a ti bawk.

Addl SP, Pu Lalhmangaihhlua chuan report tawi pe in Hnahthial District chhungah kum 2024 chhuang khan Traffic dan bawhchhia 487 man an awm thu sawiin heng dan bawhchhiate pawisa chawitir zawng zawng tlingkhawm zat chu Rs. 3,87,200 a nih thu a tarlang.

Road Safety Month denchhen hian awareness siam nan traffic police te vilna hnuaiah zirlai naupangte traffic duty-ah hman tur niin lirthei khalh fimkhur tura inzirtirna uar takin neih a ni dawn bawk a ni.