4344/2024-2025

Champhai,19th February 2025: Champhai Police ten kum 2023 April leh Kum 2024 May thla inkara Ruihhlo an man khawm cheng vaibelchhe 61.68 (₹ 61,68,28,315/-) man hu  chu vawiin chawhma khan Champhai District Bawrhsap Pu VL Remliana chuan District Hospital Champhaia thil halralna hmun Incinerator-ah a halral. 

Khuallian Pu VL Remliana thusawiin thalai tam tak suattu ruihhlo thahnem tak man a nih theihna tur leh halral a nih theihna tura hmalatu Champhai Police te chu fakawm a tih thu a sawiin an chungah lawmthu a sawi a. Ṭhalai ruihhlo bawiha tang mekte nun chhanhimna kawnga thil pawimawh tak anih a beisei thu a sawi bawk a ni. Bawrhsap chuan ruihhlo man hi tam hle mahse man lo a kal tlang tam tak pawh a awm dawn tih sawiin, a do zelna kawngah tlawmngai pawl, khawtlang mipuite leh dan kengkawhtute an tanrual hle a ngai a ni, a ti a. Ruihhlo hian kan thalai tam tak nunna a la suat zel dawn a ni tih hre thara ruihhlo in min luh chilh reng chuan Mizo te hi kan ral mai a hlauhawm hle a, khua kan tlai hmain thapui thawha ruihhlo do a dan chah a ṭul hle a ni tiin tanrualpuiah mipuite chu a sawm bawk a ni. 

Champhai SP Pu Shivendu Bhusan pawhin thu sawiin ruihhlo halral hriatpui tura kalkhawmte chungah lawmthu a sawi a, ruihhlo tam tak an manna kawnga ṭha taka thawhpui thin tu NGO hrang hrang te, Department leh chanchinbumite chungah lawmthu a sawi a, hun lo kal zel turah pawh ṭawiawm zel turin a sawm a ni. 

Champhai Police-te ruihhlo man vawiina halral takte hi heroin Kg 26.135, a hlut zawng Rs.7,84,05,000/- leh Methamphetamine kg 84.97, a hlut zawng Rs.11,04,61,000/-, Crystal Methamphetamine kg 14.261 a hlut zawng Rs.42,78,30,000/-, Ganja Kg 26.463 a hlut zawng Rs.1,32,315/- te an ni a.  Ruihhlo halral zawng zawng hlut zawng hi Rs. 61,68,28,315 man hu a ni. Heng Ruihhlo halral tak te hi Champhai District Police ten ND&PS Act hnuaia thubuai an ziah niin a vaiin case 79 ziah luh a ni. Ruihhlo halral turte hi enfiah a nih hnuah halralna hmunah khuallianin mei depkaiin a halral a ni.

Champhai District Police-te hian Kum 2024 chhung khan ND&PS Act hnuaiah Case 172 an ziak lut a, mi 221 man niin heng zinga mi 39 chu ramdang mi an ni. Heroin an man zat hi 47.107 Kg a ni a, a hlut zawng hi Rs.14,13,21,000/- a ni, Methamphetamine hi 206.312 Kg man a ni a, a hlut zawng hi Rs.26,82,05,600/- man hu a ni bawk, tin Crystal Methamphetamine hi 34.155 Kg man niin a hlut zawng hi Rs.1,02,46,50,000/- man hu a ni.

Kumin January Ni 1, 2025 atanga vawiin February Ni 19, 2025 thleng hian Champhai Police chuan ND&PS Act hnuaiah case 23 ziak lut tawhin heng ruhhlo tawlhruk kaihnawihah hian mi 29 man an ni a, heng zinga mi 9 te chu ramdang mi an ni. Heng case ziahluh kaihnawiah hian Heroin man zat hi 3.975Kg a ni a, a hlut zawng hi Rs.1,19,25,000/- a ni.

Methamphetamine man zat hi 82.079Kg a ni a, a hlut zawng hi Rs.10,67,02,700/- a ni a, Crystal Methamphetamine man zat hi 7.111Kg niin, a hlut zawng hi Rs.21,33,30,000/- a ni.

He hunah hian Pu PC Lalṭanpuia, Addl SP chuan kaihruaiin, ruihhlo man chungchang report kimchang a pe bawk a. Pu Dennis Vanlallura,DSP Champhaiin lawmthu sawiin Ruihhlo halral inkhawm  hi a khar a ni.

Ruihhlo Halralna hunah hian Champhai District NCORD member-te bakah sawrkar department hrang hrang aiawhte an tel a, Sub Hqrs YMA hruaitute an tel bawk a ni.