Vawiin hian Lal Thanhawla Higher Secondary School, Serchhipah Electoral Roll-a hming chuan tir a pawimawh zia inzirtirna leh sawi hona hun ‘Interactive School Engagement’ hman a ni a, District Election Officer Dr. Lalrozama, IAS District Bawrhsap chuan he hun hi a hmanpui.

Bawrhsap chuan Democracy ram ropui tak India ramah kan awm a, inthlang ram kan ni a, mipuite rorelna ram kan ni tih hi ka hriat chian a tul a. Kan aiawha ding turte chu kan vote hmangin kan din tir thin. Chu dinhmun pawimawh tak luah tur chuan Electoral Roll-ah kan awm ngei a ngai a ni a ti. Tuna School naupang ni mekte hi vote nei rual la ni lo mahse eng nge kan nih a, eng hi nge kan mawhphurhna tih kan hriat chian a tha a. Inthlan niah ngaihtuahna pawh hmang mumal lova, vote thlak tawp mai hi a tha lova, khua leh tui tha chuan ram tana tha tur a ngaihtuah thin tur a ni a ti. Zirlaite chu tum mumal tak nei tura chahin, chu chu hlawhtlinna kawng pawimawh tak ni a a hriat thu a sawi bawk.

Pu Vanlalrengpuia, MCS, Election Officer chuan he hun hman anih chhan sawiin, Election Commission of India-in kum 2017 a a thupui chu “Empowering Young & Future Voters” a ni a, ECI hian India khua leh tui dik tak, kum 18 tling chin chu Electoral Roll-a awm ngei turin a duh ani a ti a, chu chu ram tana kan tih ve ngei ngei tur leh kan mawhphurhna a ni a ti bawk. Sawrkarin inchhiarna chi hrang hrang a nei thin a, chunaghte chuan India khua leh tui ni chiah lo te pawh an tel chang a awm fo thin. Mahse Electoral Roll-ah erawh hi chuan India khua leh tui dik tak chauh dah luh tur a ni a, Electoral Roll-a kan awm hian kan nihna dik tak ti lang theitu thil pawimawh tak a ni tih hriat reng tur a ni a ti. Kum 18 tling tharte tana Roll-a inziah luh dan tur sawiin a lem nena entirna nen hun hi hman a ni.