Mizoram Upa Pawl Durtlang Unit in vawiina Durtlang MC Hall-a Diamond Jubilee an lawm chu Pu Lal Thanzara I & PR Minister in a hmanpui.

Mizo zinga lehkhathiam hmasa Missionary-te Bible Mizo tawnga lehlin te pawh lo pui thintu Pu Suakan ringtu hmasate inhumhimna tur hmun atana a din Durtlanga Mizoram Upa Pawl Unit-in Diamond Jubilee ( kum 50 ) hial lawm thei a Pathian hruaina duhawm tak an dawng chu lawmawm a tih thu Khuallian Pu Lal Thanzara chuan sawiin Pu Suakan, ‘Durtlang chu a pumin Lal Isua kan hlan, mi zawng zawng thing leh hnim zawng zawng Pathian rawngbawl nan leh a ropui nan ni rawh se’ a lo tih ang ngeiin, tihdam rawngbawlna hmunpui Hospital Missionary hmasa Rev F.J Sundey-a lu nghahna hmun, Pathian thu zirna tha Thoelogical College dinna, khaw hrisel leh nuam Durtlang MUP te chuan an vanneih zia in hre thar zel tura a duh thu sawiin amah ngei pawh chu lal khawnbawl Upa Lalhluna tupa a nih avangin Durtlang khua leh tui rimnam a nih inhria a, a intih mikhual loh thu a sawi.

MUP Motto (mite tana malsawmna nih) chu hre renga Motto nunpui vek tura chah in Pu Lal Thanzara chuan hnam fing zawk a ngaih khawthlang ram amiten upa ngaihsak hmanlo a, tu leh faten tar chawmna in Old Age Home-a an nu leh pate an dah laiin keini ramah MUP unit tin ten an unit a member-te ngaihven a an dawm kang thin chu a hlu in chin zel a tana thil duhawm tak a nih thu a sawi a, kan khawtlang hi thalai deuh hlir niin upa hmuh tur te hi awm ta mang lo se a nuam dawn lo a, upa te uap khua, kum upa tamna veng nihte hi a thlamuan thlak hle a ni a, a ti.

Sam ziaktuin a sawi ang a “Tar hnuah pawh an la rah fo anga, tui pai teuhin an hring hluah hluah ang” tih chu an chanvo lo ni turin Durtlang MUP member-te chu duhsaknaa hlan a ni.

Pu Thanchunga, President in a kaihhruai vawiin Jubilee lawmna ah hian Chawhma lamah Lengkhawm zai leh hruaitu thar thlangin hun hman a ni a, chhun lamah Jubilee dar vuak a ni a. Chawhnu ah thusawi hrang hrang ngaihthlak niin tlai lamah Jubilee lawmna ruai theh a ni.