Directorate of Sports & Youth Services, Government of Mizoram leh Ministry of Tribal Affairs hnuaia Vanbandhu Kalyan Yojana tangkawp in ni hnih awh Mizo Traditional Games, 2017 Kolasib district tana Kawnpui Hockey Ground a a buatsaih chu vawiin khan Pu Hmingdailova Khiangte, Parliamentary Secretary in a khar.

Kharna inkhawmah hian Pu Hmingdailova Khiangte chuan thangtharten kan pi pute infiam dan leh kan hnam ziarang an theihnghilh mai loh nana Sports & Youth Services Department in Traditional Games an buatsaih chu lawmawm a tih thu a sawi a. Nundan phung changkang zelah hnam ziarang chawinun nachang kan hriat zel a pawimawh a, kan pipute nun zemawi kan chhawm nun zel a tul a ni a ti.

Mizo Traditional Games, 2017 ah hian hmanlai mizo infiamna chi hrang hrang pariat hmangin intihsiakna neih a ni a. Mipa puitling tan inbuan, insuknawr leh insaihruipawh ah inelna neih a ni a. Hmeichhe tan ketaminu intlansiak leh kawi inkahsiak ah inelna neih niin, naupang tan kalchhet kal, arpa insual leh sairawkherh perh hmangin inelna neih a ni bawk.