Vawiin chawhma khan Agriculture Minister Pu R. Lalzirliana chuan KVK Lengpui ah Central Instrumentation Laboratory a hawng a. Hemi hnu hian Mamit District chhunga khaw 10 thlanchhuaha khuai khawitute hmantur, khuaikhawi puihtu bungraw thenkhat a sem chhunzawm a. NABARD bul tuma KVK Mamit in a buatsaih 'Exposure tour of beekeepers of Mamit District to South Tripura on keeping and honey production" a fehchhuak tur te pawh a vailiam nghal a ni.

Agriculture Minister Pu R. Lalzirliana chuan Mizoram kuthnathawktute tihhmasawnna kawnga NABARD thawhpuina leh inhawnna chu lawmawm a tih thu a sawi a. KVK hmalakna te chu tha hle mahse kuthnathawktu tamtak, a bikin thingtlang loneitute chhawr tangkai tur erawh chuan puanzar a hlawhlo niin a sawi a. Kuthnathawktute chhawr tangkai tur thiamna leh demonstration farm a hlawhtlinna hmuhchhuah te chu lo leh huan neitute hriatah puangzar tam tur leh media chakna hman thiam pawh inzir thar leh turin Agriculture mithiam leh KVK hnathawkte chu a chah a. Kum tam tak liamta atangin agriculture ah Mizoram in mithiam tam tak an lo chhawr tawh leh chhawr mek thu sawiin hmasawnna kawngah erawh mipui beisei hmuh tur a awm lova. Hemi kawngah hian Agriculture mithiam te chiah mawhchhiat theih an nih loh thu leh lo/huan neitute pawhin an thahnem ngaihna leh an taimakna te peipun an mamawh tih a lang a ti. Sawrkar atanga tanpuina chu eikhawp tharchhuahna a nih nghal loh thu sawiin tanpuina a nih angin kuthnathawktute chawhphurna atan leh an hmalakna kawngah engemaw chen puihtu atana tih a nih thu a tarlang. Mizoram ah Research Centre tha tam tak te mipui in an chhawrloh chhan pakhat chu deputation a hnamdang mithiam rawn lut ten Mizo tawng an thiam thin loh vang a nih thu sawiin Agriculture ah ngat phei chuan hnamdang mithiam chhawr a ngai a nih pawhin pawl 6 zirlai Mizo Tawng ang chin tal chu an thiam a ngai a ni a ti a. Agriculture thiamna mamawhtu loneitute tan Mizo Tawnga biak theih si loh mithiam pui pui chhawr ngaihna a awm lo a ti.

Pu D.K. Mishra, GM, NABARD, Mizoram pawhin thusawina hun hmangin Mizoram sawrkar leh NABARD thawhhona a that thu a sawi a. Hun reilote chhungin lirthei kal theihna fehkawng te pawh tam tham tak sial a nih theih nan Mizoram sawrkar nen hmalak an tum thu sawiin Agriculture thila hmalakna thar leh hlawk tura ngaih ah te NABARD chu a inhawn thu a tarlang.

Dr. Samuel Lalliansanga, Sr. Scientist & Head, KVK, Mamit District in Technical report a pek dan chuan State Plan Fund hnuaia RKVY sum hmanga sak, Central Instrumentation Laboratory sakna atan hian Rs.20 lakh hman a ni a, Laboratory bungraw hrang hrang leina atan hian Rs 130 lakh sen a ni a; kum 2015-16 khan Rs. 10.95 lakh hmanbelh leh a ni.

Laboratory hawnna leh khuaikhawina hmanrua semna hun hi Pu Lalthansiama, Director, Agriculture (R&E) in a kaihruai a. KVK leh Agriculture (R&E) thawhona leh hmalaknate Pu J.Lalzamliana, Jt Director leh Pu R.L.Thanzuala, Jt Director, Agriculture Department ten an tarlang a. Agriculture Minister Pu R.Lalzirliana hnen atangin khuai khawina atana bungraw tangkai te chu khuai khawitu ten an dawng a ni.