Rooftop Solar chungchang zirhona workshop chu vawiin khan Power and Electricity Engineer-in-Chief Office, Mizoram New Capital Complex-ah Power Minister Pu R.Lalzirliana’n a hawng. Mizoram hmun hrang hrangah Rooftop Solar Plant bun tura hmalak thawh hnihna (phase-II) bul tan a ni leh dawn a. Phase-II ah hian Mizoram target chu kilowatt 500 niin, chenna in (residential area) a huam dawn a ni.

Pu R.Lalzirliana chuan Power Engineer te fuihin an thiamna leh finnate ram tana hmang zel tur te, inlungrualna leh thawhhona tha chhawm nung zel turin a chah. India sawrkar chuan ni chakna, thli leh tuikhuah hmanga power siam chhuah a ngai pawimawh a, a bik takin Ni chakna hmanga power siam chhuah tumin nasa takin tan a la, a ti a. Ruahtui tamna Mizoram angah chuan State dang thenkhatte angin Solar Power hi chhawr tangkai viau thei lo mahila, kawlphetha mamawhna engemaw chen a phuhru thei dawn tiin solar power chungchang zir tura sawrkarin Gujarat-a Mizo engineer a tirhte pawh he project atan hian an tangkai hle dawn nia a hmuh thu a sawi.

Sawrkar laipui chuan Ni chakna hmanga kawlphetha siam chhuah hna a ngai pawimawh a, kum 2022 ah chuan in chunga dah chi (rooftop solar) hmanga megawatt 40,000 neih theih a inbeisei. Phase-II of grid connected rooftop and small solar power plant programme vawiina engineer rual ten an zirho tur pawh hi February ni 19, 2019 khan sawrkar laipuiin a pawm a, Mizoramah chuan Power and Electricity Department in he scheme hi a kengkawh dawn a ni. Ministry of New and Renewable Energy (MNRE) kaihhruaina hnuaiah Government of India in Rooftop Solar Programme a siam hi World Bank chuan a thlawp a, State Bank of India hnenah pawisa puk tirin SBI kaltlang hian he scheme hi kalpui a ni dawn a ni. Pawisa puk tir bakah MNRE leh World Bank te hian technical thilah tanpuina hna an thawk bawk ang.

Vawiin Workshop hawnna programme hi Engineer-in-Chief Pu Lalduhzuala Sailo chuan a kaihruai a, Chief Engineer (RE) Pu David C.Zahmuaka’n lawmthu sawiin hun hnung a khar. Workshop hi nilenga neih a ni a, World Bank of India hnuaia implementing agency - Ernst and Young atanga lo kal mithiamten Engineer rualte hi an zirtir a ni.