Vawiin chawhnu dar 1:00 khan Serchhip District Immunization Task Force Committee chu an Chairman Pi Sangchhin Chinzah, District Bawrhsap hovin a pisa ah an thukhawm a. Naupang kawthalo laka invenna tur Rota Virus Vaccine pek dan tur chungchang an sawi ho.

Chairman Pi Sangchhin Chinzah chuan Health Department in sawrkar laipui atanga ruahmnanna programme leh scheme chi hrang hrang tam tak thawk thinin, tha taka hna an thawk thin chu fakawm a tih thu a sawi a. Ram laili leh hnam dang pawlhsawp lohna district kan nihna chhawr tangkaiin ram pum huap pawha hnathawk thate zinga kan tel thin chu lawmawm a tih thu a sawi bawk.

Dr. Lalhlunpuii, Member Secretary, chuan Rota Virus Vaccine chungchang a sawifiah a. Ram pumah naupang kum 5 hnuai lamin an thihpui tam tak leh an damlohna tam ber chu kawthalo a ni a, sawrkar laipui chuan he natna tihrem anih theih nan Rota Virus Vaccine pek hi ruahmanna thar a siam anih thu a sawi a. He vaccine dawng naupang hian kawthalo natna a kai tawh dawn lo tihna a ni bik lova, amaherawhchu he natna lakah hian thui tak a veng thei dawn a ni, a ti.

India ram state hrang hrang 11 ah he vaccine hi pek tawh niin Serchhip District ah pawh nausen hri danna pek thin hun pangngaiah August thla atang hian pek tan tur a ni dawn a, nausen thla khat leh a chanve tlingte tan he vaccine hi lak tur a ni anga, kum khat an tlin hmain vawi thum pek tur a ni dawn a ni. Vaccine hi injection ani lova, ei tura siam niin, far 5 zela ei tir tur a ni.

He hri venna hi a dawng tur nausen ten dawng kim ngei se, tih chu District Immunization Task Force Committee duh dan a ni a, sakhuana leh chhan dang avanga dawng duhlo awm lo turin mipuite an ngen nghal bawk a ni.